വീടൊരു മനോഭാവം

ഓരോ വീടും പ്രതിഫലിപ്പിക്കുന്നത് ഓരോ മനോഭാവമാണ്. നിര്‍മിച്ചെടുത്ത ഓരോ എടുപ്പിലും അതത് സംസ്കാരത്തിന്‍െറ രുചിയാണ് മുന്നിട്ടുനില്‍ക്കുന്നത്. കാലവും കാലാവസ്ഥയും വീട്ടില്‍നിന്ന് വായിച്ചെടുക്കാനാവണം.

തറ, ഭിത്തി, നിറം, മുകള്‍ ഭിത്തി, പ്രകാശം, ഫര്‍ണിച്ചര്‍ എന്നിവയെല്ലാം ചേര്‍ന്ന നൈരന്തര്യമായി വീടിന്‍െറ അകം മാറണം. ഇതിന് ഭൂമിയെ കണക്കിലെടുത്ത്, ഭംഗിയും ചെലവും പരിഗണിച്ചാണ് ഹാബിറ്റാറ്റ് കെട്ടിടനിര്‍മാണം ആസൂത്രണം ചെയ്യുന്നത്.

വീട് നിര്‍മാണത്തിലെന്നപോലെ തറയെക്കുറിച്ചും ഒരുപാട് ധാരണകള്‍ നിലനില്‍ക്കുന്നുണ്ട്. ചാണകം മെഴുകിയ തറയില്‍നിന്ന് സിമന്‍റ് തറ, ഓക്സൈഡുകള്‍, മൊസൈക്ക് ഇവയൊക്കെ പിന്നിട്ട് ടൈലുകള്‍ക്ക് മുകളിലാണ് നാമിപ്പോള്‍. വ്യത്യസ്ത വര്‍ണം ചാലിച്ച ഓക്സൈഡ് തറകള്‍ തന്നെയാണ് ചെലവ് കുറഞ്ഞതും ഉത്തമവും. കറുപ്പും ചുവപ്പും ഓക്സൈഡുകള്‍ മാത്രമുണ്ടായിരുന്നിടത്തുനിന്ന് ഒട്ടനവധി നിറങ്ങളില്‍ ഓക്സൈഡുകള്‍ ഇന്ന് സുലഭമാണ്. ഇതിന് പൊട്ടലുകള്‍ ഉണ്ടാകും എന്നതാണ് എടുത്തുപറയത്തക്ക പോരായ്മ. ഇന്ന് ഇത് പരിഹരിക്കാനും മാര്‍ഗങ്ങളുണ്ട്. മൊസൈക്ക് തറകളില്‍ ഉപയോഗിച്ചിരുന്ന ചില്ലുകള്‍ ഓക്സൈഡിനൊപ്പവും പരീക്ഷിക്കാം. ചില്ലുകൊണ്ട് തിരിച്ച് ഓക്സൈഡ് തേച്ച് പിടിപ്പിക്കാം.