ഖത്തർ: 'മിഷൻ വിങ്​സ്​ ഓഫ്​ കംപാഷൻ' ചാർ​ട്ടേർഡ്​ വിമാനം ജൂലൈ നാലിന്

ദോഹ: അർഹരായ പ്രവാസികളെ സൗജന്യമായി നാട്ടിലെത്തിക്കാനായി ഗൾഫ്​ മാധ്യമവും മീഡിയാവണ്ണും ഒരുക്കിയ 'മിഷൻ വിങ്​സ്​ ഓഫ്​ കംപാഷൻ' പദ്ധതിക്ക്​ കീഴിൽ ഖത്തറിൽ നിന്ന്​ ചാർ​ട്ടേർഡ്​ വിമാനവും. മിഷൻ വിങ്​സ്​ ഓഫ്​ കംപാഷൻെറ ചാർ​ട്ടേർഡ്​ വിമാനം ജൂലൈ നാലിന്​ രാവിലെ ഒമ്പതിന്​ ദോഹയിൽ നിന്ന്​ കോഴിക്കോ​ട്ടേക്ക്​ പറക്കും. ഇൻഡിഗോ വിമാനത്തിൽ 169 യാത്രക്കാരാണുണ്ടാവുക.

കേന്ദ്രസർക്കാറിൻെറ വന്ദേഭാരത്​ മിഷൻ വിമാനങ്ങൾ കുറവായതിനാലും എംബസിയിൽ രജിസ്​റ്റർ ചെയ്​ത നൂറുകണക്കിനാളുകൾ ഇപ്പോഴും പോകാൻ മാർഗമില്ലാതെ ദുരിതമനുഭവിക്കുന്നതിനാലാണുമാണ്​ ചാർട്ടർ വിമാനമൊരുക്കിയതെന്ന്​ ഗൾഫ്​മാധ്യമം മീഡിയാവൺ എക്​സിക്യുട്ടീവ്​ കമ്മിറ്റി ചെയർമാൻ റഹീം ഓമശ്ശേരി പറഞ്ഞു. ഇന്ത്യൻ എംബസിയുടെ അനുബന്ധ സംഘടനയായ ഐ.സി.ബി.എഫ്​ ആണ്​ ഔദ്യോഗിക നടപടികൾക്ക്​ സഹായിച്ചത്​. യാത്രക്ക്​ തെരഞ്ഞെടുക്കപ്പെട്ടവർക്ക്​ വിശദവിവരങ്ങൾ ഉടൻ അറിയിക്കും.

ഇതിനകം ആകെ 152 പേരെയാണ്​ മിഷൻ വിങ്​സ്​ ഓഫ്​ കംപാഷൻ പദ്ധതിയിൽ സൗജന്യമായി നാട്ടിലെത്തിച്ചത്​. വന്ദേഭാരത്​ വിമാനങ്ങളിൽ 97 പേരെ സൗജന്യമായി നാട്ടിലെത്തിച്ചപ്പോൾ വിവിധ ചാർ​ട്ടേർഡ്​ വിമാനങ്ങളിലായി 55 പേരെയും നാട്ടിലെത്തിക്കാനായി. വിങ്​സ്​ ഓഫ്​ കംപാഷൻെറ ജൂലൈ നാലിന്​ പോകുന്ന ചാർ​ട്ടേർഡ്​ വിമാനത്തിൽ 169പേരെയും നാട്ടിലെത്തിക്കുന്നതോടെ പദ്ധതിക്ക്​ കീഴിൽ നാട്ടിലെത്തുന്നവരുടെ എണ്ണം 321 ആകും.

കോവിഡ്​ തീർത്ത പ്രതിസന്ധയിൽ ഗൾഫിൽ പിടിച്ചുനിൽക്കാനാകാതെ ദുരിതത്തിലായി നാടണയാൻ ആശയേറെയുണ്ടായിട്ടും വിമാനടിക്കറ്റിന്​ പണമില്ലെന്ന കാരണത്താൽ കഷ്​ടപ്പെടുന്ന പ്രവാസികൾക്കായാണ്​ 'മിഷൻ വിങ്​സ്​ ഒാഫ്​ കംപാഷൻ' പദ്ധതി രൂപവത്​കരിച്ചത്​. നൻമ വറ്റാത്ത പ്രവാസി സമൂഹവും വ്യവസായ നായകരും നിശബ്​ദ സേവകരും കൈകോർത്താണ്​ പദ്ധതി യാഥാർത്ഥ്യമാക്കിയത്​. ഖത്തറിലെ വിവിധ വ്യവസായ സംരംഭകർ പദ്ധതിയിലേക്ക്​ സൗജന്യവിമാനടിക്കറ്റുകൾ സംഭാവന നൽകി. വിവിധ കൂട്ടായ്​മകളും സംഘടനകളും പദ്ധതിയുമായി സഹകരിച്ചു.

കുഞ്ഞുങ്ങൾ അവരുടെ കൊച്ചുകൊച്ചുസമ്പാദ്യങ്ങൾ കൂട്ടിവച്ച്​ പദ്ധതിക്കായി ആവുന്ന സാമ്പത്തിക സഹായം നൽകി. ഇതോടെ ദിവസങ്ങൾക്കുള്ളിൽ തന്നെ നിരവധി ടിക്കറ്റുകളാണ്​ സജ്ജമാക്കാനായത്​. എല്ലാ ജി.സി.സി രാജ്യങ്ങളിലും പദ്ധതിക്ക്​ കീഴിൽ ഇത്തരത്തിൽ പ്രവാസികളെ സൗജന്യമായി നാട്ടിലെത്തിക്കുന്നുണ്ട്​. കോവിഡിൻെറ പശ്​ചാത്തലത്തിൽ ഇന്ത്യക്കാരെ നാട്ടിലെത്തിക്കാൻ ഇന്ത്യൻ സർക്കാർ അയക്കുന്ന പ്രത്യേക വിമാനങ്ങളിലെ യാത്രക്ക്​ തെരഞ്ഞെടുക്കപ്പെട്ടിട്ടും ടിക്കറ്റിന്​ പണമില്ലാതെ കഷ്​ടപ്പെടുന്നവർക്കാണ്​ വിമാനടിക്കറ്റുകൾ നൽകുന്നത്​. പദ്ധതിക്ക്​ കീഴിൽ രജിസ്​റ്റർ ചെയ്​തവരിൽ നിന്ന്​ ​സൂക്ഷ്​​മപരിശോധനയിലൂടെയാണ്​ സൗജന്യടിക്കറ്റിന്​ അർഹരായവരെ തെരഞ്ഞെടുക്കുന്നത്​. ഇതിനായി പ്രത്യേകകമ്മിറ്റികൾ തന്നെ പ്രവർത്തിക്കുന്നുണ്ട്​.