തീപിടിച്ച കാറിൽനിന്ന്​ സൗദി കാറോട്ട താരവും സഹായിയും കഷ്​ടിച്ച്​ രക്ഷപ്പെട്ടു

ജിദ്ദ: സൗദി കാറോട്ട താരം യസീദ്​ അൽറാജിഹ്​ കാറപകടത്തിൽനിന്ന്​ കഷ്​ടിച്ചു രക്ഷപ്പെട്ടു. പോളണ്ടിൽ ക്രോസ്​ കൺട്രി റാലിക്ക്​ വേണ്ടിയുള്ള ലോകകപ്പി​െൻറ പോളിഷ്​ ബജാ റൗണ്ടിൽ പ​​ങ്കെടുക്കുന്നതിനിടെയാണ്​ കാറിന്​ തീപിടിച്ചത്​. കാറിന്​ സാ​ങ്കേതിക തകറാറുണ്ടാകുകയും പിന്നീട്​ പൂർണമായും കത്തി നശിക്കുകയുമായിരുന്നു. തീപിടിത്തത്തിന്റെ വീഡിയോ സമൂഹ മാധ്യമങ്ങളിൽ വ്യാപകമായി പ്രചരിച്ചു. താനും സഹായിയും സുഖമായിരിക്കുന്നുവെന്ന് യസീദ്​ അൽറാജിഹ്​ തന്നെ ആരാധകരെ​ ട്വിറ്ററിലൂടെ അറിയിക്കുകയായിരുന്നു.

ട്വിറ്ററിൽ ത​ന്റെ കാറിൽ തീ ആളിപ്പടരുന്നതി​ന്റെ ചിത്രവും വീഡിയോയും യസീദ്​ അൽറാജിഹ്​ പോസ്​റ്റ്​​ ചെയ്‌തു. 'ദൈവത്തിന് സ്തുതി, ഒരു അപകടത്തിൽനിന്ന്​ രക്ഷപ്പെട്ടു. സാങ്കേതിക തകരാർ കാരണം മരുഭൂ റാലിക്ക് വേണ്ടിയുള്ള ലോകകപ്പി​െൻറ ബജാ പോളണ്ട് റൗണ്ടിൽ എ​െൻറ കാർ കത്തിയമർന്നു. ഞാനും സഹായിയും സുഖമായിരിക്കുന്നു. എനിക്കുവേണ്ടി പ്രാർഥിക്കുകയും സംഭവത്തെ കുറിച്ച്​ അന്വേഷിക്കുകയും ചെയ്​ത എല്ലാവർക്കും നന്ദി പറയുന്നു. എനിക്ക്​ മറുപടി നൽകാൻ കഴിയാത്തതിൽ ക്ഷമ ചോദിക്കുന്നു' എന്നാണ്​ യസീദ്​ അൽറാജിഹി ട്വിറ്ററിൽ കുറിച്ചത്​.

'പെ​ട്ടെന്ന്​ ഇന്ധന ഗന്ധം പുറത്തേക്ക് വമിച്ചു. ഉടൻ തന്നെ ഒരു മുന്നറിയിപ്പ് അടയാളം പ്രത്യക്ഷപ്പെട്ടു. ഇന്ധന ഗന്ധം വ്യാപകമായി പരന്നു. വാഹനം നിർത്തി. ഉടൻ താനും സഹായി മൈക്കിളും വേഗത്തിൽ പുറത്തിറങ്ങുകയായിരുന്നു' -കാർ കത്തിയതിനെ കുറിച്ച്​ യസീദ്​ അൽറാജിഹി ഇങ്ങനെയാണ്​ വിവരിക്കുന്നത്​. 'ദൈവത്തിന്​ സ്​തുതി. സഹായിക്ക്​ നിസാര പരിക്കുണ്ടെന്നും അദ്ദേഹം കൂട്ടിച്ചേർത്തു.