'വിക്രം' ബുർജ്​ ഖലീഫയിൽ; ഫാൻസിനെ കൈയിലെടുത്ത്​ ഉലകനായകൻ

ദുബൈ: ലോകേഷ്​ കനകരാജ്​ സംവിധാനം ചെയ്യുന്ന കമൽഹാസൻ ചിത്രം 'വിക്രമിന്‍റെ' ട്രെയിലർ ബുർജ്​ ഖലീഫയിൽ. പ്രദർശനം നേരിൽ കാണാൻ കമൽഹാസനും എത്തിയതോടെ ആരാധകർ ആവേശത്തിലായി. ബുധനാഴ്ച രാത്രിയായിരുന്നു ചിത്രത്തിന്‍റെ ട്രെയിലർ ബുർജ്​ ഖലീഫയിൽ തെളിഞ്ഞത്​. വെള്ളിയാഴ്ച നടക്കുന്ന വേൾഡ്​ വൈഡ്​ റിലീസിന്‍റെ ഭാഗമായാണ്​ കമൽ ഹാസൻ ദുബൈയിൽ എത്തിയത്​.

ട്രെയിലർ കാണാൻ നിരവധി ആരാധകരാണ്​ ബുർജിന്​ താഴെ അണിനിരന്നത്​. അഡ്രസ്​ ഡൗൺ ടൗണിന്‍റെ മുകളിലെത്തിയ കമൽ ഹാസൻ ആരാധകരെ അഭിവാദ്യം ചെയ്തതോടെ അവർ ആവേശക്കൊടുമുടിയിലായി. 'വിക്രം വിക്രം' എന്ന ആർപ്പുവിളികളോടെയാണ്​ അവർ ട്രെയിലർ ഏറ്റെടുത്തത്​.

സിനിമകളുടെ നിലവാരത്തിൽ പ്രകടമായ വ്യത്യാസം വന്നിട്ടുണ്ടെന്നും സാ​ങ്കേതിക വിദ്യയുടെ വളർച്ച അവിശ്വസനീയമാണെന്നും കമൽഹാസൻ വാർത്ത സമ്മേളനത്തിൽ പറഞ്ഞു. 15 വർഷം മുമ്പ് സിനിമ സംവിധാനം ചെയ്യുമ്പോൾ ഇതൊന്നും സങ്കൽപ്പിക്കാൻ പോലും കഴിഞ്ഞിരുന്നില്ല. ഒ.ടി.ടി പോലുള്ള പ്ലാറ്റ്​ഫോമുകൾ സിനിമക്ക്​ ഏറെ ഗുണം ചെയ്യുമെന്നും അദ്ദേഹം കൂട്ടിച്ചേർത്തു. വിജയ്​ സേതുപതി, ഫഹദ്​ ഫാസിൽ തുടങ്ങിയവരും ചിത്രത്തിൽ അഭിനയിക്കുന്നുണ്ട്​.