ആയിഷ പറയുന്നു; ഇത്​ അല്ലാഹുവി​െൻറ അനുഗ്രഹം

മനാമ: ​തിരുവനന്തപുരം സെ​ൻട്രൽ സ്​റ്റേഡിയത്തിലെ വിശാലമായ വേദിയിൽ അഹമ്മദ്​ ദേവർകോവിൽ കേരളത്തി​​െൻറ മന്ത്രിയായി സത്യപ്രതിജ്​ഞ ചെയ്​ത്​ അധികാരമേൽക്കു​േമ്പാൾ ഇങ്ങ്​ ബഹ്​റൈനിലെ മനാമയിൽ ടെലിവിഷന്​ മുന്നിൽ ഇമവെട്ടാതെ കാത്തിരുന്ന ഒരാളുണ്ട്​. മറ്റാരുമല്ല; അ​ദ്ദേഹത്തി​െൻറ സഹോദരി ആയിഷ ജമാൽ. 30 വർഷമായി കുടുംബസമേതം ബഹ്​റൈനിലുള്ള ആയിഷക്ക്​ ഇത്​ അല്ലാഹുവി​െൻറ അനുഗ്രഹങ്ങളിൽ ഒന്നാണ്​. സഹോദര​ൻ മന്ത്രിയാകു​േമ്പാൾ ഇതിലും വലിയൊരു സന്തോഷമില്ലെന്ന്​ പറയുകയാണ്​ ആയിഷ.

കോഴിക്കോട്​ കുറ്റ്യാടി ദേവർകോവിൽ സ്വദേശിയായ അഹമ്മദ്​ ദേവർകോവിലി​െൻറ നാല്​ സഹോദരിമാരിൽ ആയിഷ ഉൾപ്പെടെ രണ്ട്​ പേരാണ്​ ബഹ്​റൈനിൽ ഉള്ളത്​. മറ്റൊരാളായ സൗദ അബ്​ദുല്ല രണ്ട്​ മാസം മുമ്പാണ്​ നാട്ടിലേക്ക്​ പോയത്​. ഇവരും വർഷങ്ങളായി കുടുംബ സമേതം ബഹ്​റൈനിലുണ്ട്​. ബാബുൽ ബഹ്​റൈനിൽ ക്ലാസിക്​ വാച്ച്​ ഷോറൂം നടത്തുന്ന ജമാലി​െൻറ ഭാര്യയാണ്​ ആയിഷ. ജാസിബ ഷഫീഖ്​, മാജിദ്​ ജമാൽ, ഹാഷിർ ജമാൽ എന്നിവർ മക്കളാണ്​.

അഹമ്മദ്​ ദേവർകോവിൽ എം.എൽ.എ ആകുമെന്ന്​ പ്രതീക്ഷിച്ചിരുന്നുവെങ്കിലും മന്ത്രിയാകുമെന്ന്​ കരുതിയിരുന്നില്ലെന്ന്​ ജമാൽ പറഞ്ഞു. ഇത്രയും കാലം ഇടതുമുന്നണിക്കൊപ്പം ഉറച്ചുനിന്നതിന്​ ലഭിച്ച അർഹിച്ച പ്രതിഫലമാണ്​ ഇത്​. പിണറായി വിജയ​െൻറ നേതൃത്വത്തിൽ ഇടതുമുന്നണി സർക്കാർ വീണ്ടും അധികാരത്തിൽ എത്തിയതിൽ സന്തോഷമുണ്ടെന്നും അദ്ദേഹം പറഞ്ഞു.

ചെറുപ്പം മുതൽ തന്നെ രാഷ്​ട്രീയത്തിലും സാമൂഹിക പ്രവർത്തനത്തിലും താൽപര്യമുള്ള ആളായിരുന്നു സഹോദരനെന്ന്​ ആയിഷ പറഞ്ഞു. ആറ്​ മാസം മുമ്പ്​ നാട്ടിൽ പോയപ്പോഴാണ്​ അവസാനം നേരിൽ കണ്ടത്​. ബുധനാഴ്​ച രാത്രിയിലും വിളിച്ച്​ സന്തോഷം പങ്കുവെച്ചിരുന്നു. വ്യാഴാഴ്​ച സത്യപ്രതിജ്​ഞയുടെ തിരക്കുകൾ കഴിഞ്ഞ്​ വിളിക്കാൻ കാത്തിരിക്കുകയാണെന്നും അവർ കൂട്ടിച്ചേർത്തു.

ഇപ്പോൾ കോഴിക്കോട്​ ജവഹർനഗറിൽ താമസിക്കുന്ന അഹമ്മദ്​ ദേവർ കോവിൽ എല്ലാ ഞായറാഴ്​ചയും കുറ്റ്യാടിയിലെ തറവാട്ട്​ വീട്ടിലെത്തും. ബന്ധുക്കളെയും നാട്ടുകാരെയും കണ്ട്​ സംസാരിക്കും. വിശേഷങ്ങൾ ചോദിച്ചറിയും. ബിസിനസ്​ ഉൾപ്പെടെ തിരക്കുകൾക്കിടയിലും എല്ലാവരുമായും നല്ല അടുപ്പം കാത്തുസൂക്ഷിക്കാൻ അദ്ദേഹം സമയം കണ്ടെത്താറുണ്ടെന്നും ആയിഷ പറഞ്ഞു.