‘​അറേബ്യൻ സഫാരി’  ‘ഫ്രീഡം ട്രാവൽസ്​’ വഴി ലഭ്യമാക്കുന്ന പദ്ധതിക്ക്​ തുടക്കമായി

മനാമ: ‘ഗൾഫ്​ മാധ്യമം’ പുറത്തിറക്കിയ ‘​അറേബ്യൻ സഫാരി’ ട്രാവൽ മാഗസിൻ മനാമയിലെ ‘ഫ്രീഡം ട്രാവൽസ്​’ വഴി ലഭ്യമാക്കുന്ന പദ്ധതിക്ക്​ കഴിഞ്ഞ ദിവസം തുടക്കമായി. ‘ഫ്രീഡം ട്രാവൽസ്​’ സെയിൽസ്​ മാനേജർ സൈനൽ, ഹുസൈൻ ഹാജിക്ക്​ ടിക്കറ്റിനൊപ്പം മാഗസിൻ നൽകിയാണ്​ തുടക്കം കുറിച്ചത്​. ഒാപറേഷൻസ്​ മാനേജർ സുബൈർ അബ്​ദുൽ ഖാദർ, ‘ഗൾഫ്​ മാധ്യമം’ പ്രതിനിധി വി.അബ്​ദുൽ ജലീൽ എന്നിവർ സംബന്ധിച്ചു. 
സഞ്ചരിക്കുന്ന പുതുതലമുറയുടെ താൽപര്യങ്ങൾ പരിഗണിച്ച്​ തയാറാക്കിയ സമ്പൂർണ യാത്ര മാഗസിനാണ്​ ‘​അറേബ്യൻ സഫാരി’. ഒമ്പതു രാജ്യങ്ങളും 12 വൻ നഗരങ്ങളും നൂറിലേറെ ലക്ഷ്യസ്ഥാനങ്ങളും വായനക്കാരിലെത്തിക്കുന്ന പ്രഥമ ലക്കത്തിൽ അറേബ്യയാണ്​ ഫോക്കസ്​. 13 പ്രവിശ്യകളിൽ പരന്നുകിടക്കുന്ന സൗദി അറേബ്യയുടെ യാത്ര സാധ്യതകളാണ്​ മാഗസിൻ പ്രധാനമായും അ​േന്വഷിക്കുന്നത്​. 
ജോർഡൻ, ഇൗജിപ്​ത്​, തുർക്കി എന്നിവക്ക്​ പുറമേ, കുവൈത്ത്​, ബഹ്​റൈൻ, യു.എ.ഇ, ഖത്തർ, ഒമാൻ എന്നീ ജി.സി.സി രാഷ്​ട്രങ്ങളുടെയും പ്രാഥമിക യാത്ര വിവരങ്ങൾ ഇതിൽ ഉൾക്കൊള്ളിച്ചിരുക്കുന്നു. ഇന്ത്യക്കാരന്​ ഇത്തരം രാജ്യങ്ങളിൽ വിസ ലഭിക്കുന്നതിന്​ വേണ്ട നടപടിക്രമങ്ങൾ, ശ്രദ്ധിക്കേണ്ട കാര്യങ്ങൾ, വിവിധ കേ​​ന്ദ്രങ്ങളിലേക്കുള്ള ഫീസ്​ എന്നിവയും നൽകിയിട്ടുണ്ട്​. 
മലയാളത്തി​​െൻറ ഒന്നാംനിര എഴുത്തുകാരനും സഞ്ചാര സാഹിത്യകാരനുമായ സക്കറിയ, ‘ദൈവത്തി​​െൻറ പുസ്​തകം’ എന്ന ഇതിഹാസ മാനമുള്ള ഒടുവിലത്തെ നോവലിലൂ​െട പ്രവാസി വായനക്കാരുടെ ഇഷ്​ടക്കാരനായ കെ.പി രാമനുണ്ണി, മരുഭൂമിയുടെ ജീവചരിത്രകാരനായ വി. മുസഫർ അഹമ്മദ്​ എന്നിവരുടെ സാന്നിധ്യമാണ്​ മാഗസിനെ ശ്രദ്ധേയമാക്കുന്നത്​. ഒരു ദിനാർ വിലയുള്ള ‘അറേബ്യൻ സഫാരി’ വിവിധ ന്യൂസ്​ സ്​റ്റാളുകൾ വഴിയും ‘ഗൾഫ്​ മാധ്യമം’ എജൻറുമാർ മുഖേനയും ലഭ്യമാണ്​.