പിയൂഷ്​ ശ്രീവാസ്​തവ ബഹ്​റൈനിലെ പുതിയ ഇന്ത്യൻ അംബാസഡർ

മനാമ: ബഹ്​റൈനിലെ പുതിയ ഇന്ത്യൻ അംബാസഡറായി പിയൂഷ്​ ശ്രീവാസ്​തവയെ നിയമിച്ചു. ഇന്ത്യൻ വിദേശകാര്യ മന്ത്രാലയമാണ് ​ ഇക്കാര്യം അറിയിച്ചത്​. 1998 ബാച്ച്​ ​െഎ.എഫ്​.എസ്​ ഉദ്യോഗസ്​ഥനായ അദ്ദേഹം നിലവിൽ വിദേശകാര്യ മന്ത്രാലയത്തിൽ ജോയിൻറ്​ സെക്രട്ടറിയാണ്​. വൈകാതെ അദ്ദേഹം ചുമതലയേൽക്കുമെന്നും വിദേശകാര്യ മന്ത്രാലയം വാർത്താക്കുറിപ്പിൽ അറിയിച്ചു. മുൻ അംബാസഡറായിരുന്ന അലോക്​ കുമാർ സിൻഹ ജനുവരിയിൽ തിരിച്ചുപോയതിനുശേഷം തസ്​തിക ഒഴിഞ്ഞുകിടക്കുകയായിരുന്നു.

കോവിഡ്​ ദുരിതങ്ങൾക്ക്​ നടുവിലും ബഹ്​റൈനിൽ ഇന്ത്യൻ എംബസിയിൽ അംബാസഡർ ഇല്ലാത്തത്​ പ്രതിഷേധത്തിന്​ ഇടയാക്കിയിരുന്നു. ദുരിതാശ്വാസ പ്രവർത്തനങ്ങൾ ഏകോപിപ്പിക്കുന്നതിനും മറ്റും അംബാസഡറുടെ സേവനം ലഭ്യമാക്കണമെന്നാവശ്യപ്പെട്ട്​ ബഹ്​റൈനിലെ വിവിധ സംഘടനകൾ ഇന്ത്യയിലെ ജനപ്രതിനിധികൾ മുഖേനയും നേരിട്ടും നിവേദനം നൽകുകയും ചെയ്​തു.