ഇന്ത്യയെ റെഡ്​ലിസ്റ്റിൽനിന്ന്​ ഒഴിവാക്കി ബഹ്​റൈൻ

മനാമ: ഇന്ത്യ ഉൾപ്പെടെ നാല്​ രാജ്യങ്ങളെ റെഡ്​ ലിസ്​റ്റ്​ പട്ടികയിൽനിന്ന്​ ബഹ്​റൈൻ ഒഴിവാക്കി. അഞ്ച്​ രാജ്യങ്ങളെ പുതുതായി ഉൾപ്പെടുത്തുകയും ചെയ്​തു. സിവിൽ ഏവിഷേയൻ അഫയേഴ്​സാണ്​ ഇക്കാര്യം പ്രഖ്യാപിച്ചത്​. തീരുമാനം സെപ്​റ്റംബർ മൂന്നിന്​ പ്രാബല്യത്തിൽ വരും. അതേസമയം, റെഡ്​ലിസ്​റ്റിൽ ഉൾപ്പെടാത്ത രാജ്യങ്ങളിൽനിന്നുള്ള യാത്രക്കാർക്ക്​ നിലവിലുള്ള നിബന്ധനകൾ ബാധകമായിരിക്കും.

ഇന്ത്യക്ക്​ പുറമേ പാകിസ്​താൻ, പനാമ, ഡൊമിനിക്കൻ റിപ്പബ്ലിക്​ എന്നിവയാണ്​ പട്ടികയിൽനിന്ന്​ ഒഴിവായ മറ്റ്​ രാജ്യങ്ങൾ. ബോസ്​നിയ ഹെർസഗോവിന, ​െസ്ലാവേനിയ, എത്യോപ്യ, കോസ്​റ്റാറിക്ക, ഇക്വഡോർ എന്നീ രാജ്യങ്ങളാണ്​ പുതുതായി റെഡ്​ലിസ്​റ്റിൽ ഉൾപ്പെട്ടത്​.

വാക്​സിനേഷൻ സർട്ടിഫിക്കറ്റ്​ ബഹ്​റൈൻ അംഗീകരിച്ചിട്ടുള്ള രാജ്യങ്ങളിൽനിന്ന്​ വരുന്നവർക്ക്​ യാത്ര പുറപ്പെടുന്നതിന്​ മുമ്പുള്ള കോവിഡ്​ ടെസ്​റ്റ്​ ഒഴിവാക്കാനും തീരുമാനിച്ചിട്ടുണ്ട്​. റെഡ്​ ലിസ്​റ്റിൽ ഉൾപ്പെട്ട രാജ്യങ്ങൾക്ക്​ നിലവിലുള്ള നിയന്ത്രണങ്ങൾ തുടരും. 25 രാജ്യങ്ങളാണ്​ ഇപ്പോൾ റെഡ്​ലിസ്​റ്റ്​ പട്ടികയിൽ ഉള്ളത്​.

ജി.സി.സി രാജ്യങ്ങൾ, വാക്​സിൻ സർട്ടിഫിക്കറ്റി​െൻറ​ പരസ്​പര അംഗീകാരത്തിന്​ കരാറുള്ള രാജ്യങ്ങൾ, വാക്​സിൻ സർട്ടിഫിക്കറ്റിന്​ ബഹ്​റൈൻ അംഗീകാരം നൽകിയ രാജ്യങ്ങൾ എന്നിവിടങ്ങളിൽനിന്നുള്ള വാക്​സിൻ സ്വീകരിച്ച യാത്രക്കാർക്ക്​ ​യാത്ര പുറപ്പെടുന്നതിന്​ മുമ്പുള്ള പി.സി.ആർ ടെസ്​റ്റ്​ ആവശ്യമില്ല. ബഹ്​റൈനിൽ എത്തിയ ശേഷമുള്ള മൂന്ന്​ പി.സി.ആർ ടെസ്​റ്റുകൾ ഇവർക്ക്​ ആവശ്യമാണ്​.

ബഹ്​റൈനിൽ ഒാൺ അ​​ൈറവൽ വിസ ലഭിക്കാൻ അർഹതയുള്ള രാജ്യങ്ങളിൽനിന്ന്​ വാക്​സിനെടുത്ത ആറ്​ വയസിന്​ മുകളിൽ പ്രായമുള്ള യാത്രക്കാർക്കും യാത്ര പുറപ്പെടുന്നതിന്​ മുമ്പുള്ള ടെസ്​റ്റ്​ ആവശ്യമില്ല. ഇവിടെ എത്തിയ ശേഷമുള്ള മൂന്ന്​ ടെസ്​റ്റുകൾ ബാധകമാണ്​.

കോവിഡ്​ കേസുകൾ വർധിച്ച സാഹചര്യത്തിൽ മെയ്​ 23 മുതലാണ്​ ഇന്ത്യയിൽനിന്നുള്ള യാത്രക്കാർക്ക്​ നിയന്ത്രണങ്ങൾ ഏർപ്പെടുത്തിയത്​. ബഹ്​റൈൻ പൗരൻമാർ, ബഹ്​റൈനിൽ റസിഡൻസ്​ പെർമിറ്റ്​ ഉള്ളവർ എന്നിവർക്ക്​ മാത്രമാണ്​ ഇന്ത്യയിൽനിന്ന്​ ബഹ്​റൈനിലേക്ക്​ വരാൻ അനുമതിയുണ്ടായിരുന്നത്​​. സന്ദർശക വിസയിലുള്ളവർക്ക്​ അനുമതി നിഷേധിച്ചതിനാൽ സൗദിയിലേക്കുള്ള യാത്രക്കാർ ഉൾപ്പെടെ നിരവധി പേർ പ്രയാസത്തിലായിരുന്നു.