ബഹ്​റൈൻ - കോഴിക്കോട്​ വിമാനം നാളെ; ടിക്കറ്റുകൾ നൽകി

മനാമ: പ്രവാസികളെ നാട്ടിലെത്തിക്കാനുള്ള വന്ദേഭാരത്​ ദൗത്യത്തി​​​​െൻറ മൂന്നാം ഘട്ടത്തി​ൽ ബഹ്​റൈനിൽനിന്നുള്ള ആദ്യ വിമാനം ചൊവ്വാഴ്​ച​ കോഴിക്കോ​േട്ടക്ക്​ പുറപ്പെടും. വൈകീട്ട്​ 4.10ന്​ ബഹ്​റൈനിൽ നിന്ന്​ യാത്രതിരിക്കുന്ന വിമാനം ഇന്ത്യൻ സമയം രാത്രി 11ന്​ കോഴി​ക്കോട്​ എത്തും. രണ്ട്​ കൈക്കുഞ്ഞുങ്ങൾ​ ഉൾപ്പെടെ 179 യാത്രക്കാരാണ്​ ഇൗ വിമാനത്തിൽ നാട്ടിലേക്ക്​ പോകുന്നത്​. ഇവർക്കുള്ള ടിക്കറ്റുകൾ നൽകി. കോഴിക്കോട്​ നിന്ന്​ യാത്രക്കാരുമായി എത്തുന്ന വിമാനമാണ്​ തിരിച്ച്​ ഇവിടെനിന്ന്​ പുറപ്പെടുന്നത്​.

മൂന്നാം ഘട്ടത്തിൽ ബഹ്‌റൈനിൽ നിന്ന് കേരളത്തിലേക്ക് അഞ്ച്​ സർവീസുകളാണ്​ ഉള്ളത്​. മെയ്‌ 26, 30, ജൂൺ രണ്ട്​ തീയതികളിൽ കോഴിക്കോട്ടേക്കും മെയ്‌ 28,ജൂൺ ഒന്ന് തീയതികളിൽ കൊച്ചിയിലേക്കുമാണ് എയർ ഇന്ത്യ എക്​സ്​പ്രസ്​ വിമാനം സർവീസ് നടത്തുക. കോഴിക്കോട്ടേക്കുള്ള വിമാനം വൈകിട്ട് 4.10നും കൊച്ചിയിലേക്കുള്ളത് ഉച്ചക്ക് 2.10നും പുറപ്പെടും.

28ന്​ കൊച്ചിയിലേക്കുള്ള വിമാനത്തി​​​െൻറ ടിക്കറ്റ്​ വിതരണം തുടങ്ങിയിട്ടുണ്ട്​. ഇൗ വിമാനത്തിലും 177 പേരാണ്​ നാട്ടിലേക്ക്​ പോകുന്നത്​. അന്ന്​ കൊച്ചിയിൽനിന്ന്​ തിരികെ​ വരുന്ന വിമാനത്തിലും യാത്രക്കാരെ കൊണ്ടുവരുന്നുണ്ട്​​. ബഹ്​റൈൻ പൗരൻമാർക്കും സാധുവായ റസിഡൻറ്​ പെർമിറ്റ്​ ഉള്ളവർക്കുമാണ്​ യാത്രക്ക്​ അനുമതി. തിങ്കളാഴ്​ച ഇൗ വിമാനത്തിന്​ ടിക്കറ്റ്​ നിരക്ക്​ 43000 രൂപയായി ഉയർന്നു. ബഹ്​റൈനിൽനിന്ന്​ സർവീസ്​ നടത്തുന്ന മറ്റ്​ ദിവസങ്ങളിലും ഇ​ങ്ങോട്ട്​ വരുന്ന വിമാനത്തിൽ യാത്രക്കാരെ കയറ്റുന്നതിന്​ അനുമതി തേടിയിട്ടുണ്ട്​.