ബഹ്​റൈനിൽ​ വരാൻ കോവിഡ്​ ടെസ്റ്റ്​ നിർബന്ധം; കോഴിക്കോട്​ ഏഴുപേരെ​ തിരിച്ചയച്ചു

മനാമ: ഇന്ത്യയിൽനിന്ന്​ ബഹ്​റൈനിലേക്ക്​ വരുന്ന യാത്രക്കാർ കോവിഡ്​ നെഗറ്റീവ്​ ആർ.ടി. പി.സി.ആർ ടെസ്​റ്റ്​ സർട്ടിഫിക്കറ്റ്​ ഹാജരാക്കണമെന്ന വ്യവസ്​ഥ പ്രാബല്യത്തിൽവന്നു. കുട്ടികളും കൈക്കുഞ്ഞുങ്ങളും ഉൾപ്പെടെ എല്ലാ യാത്രക്കാർക്കും കോവിഡ്​ പരിശോധന വേണമെന്ന നിബന്ധനയുണ്ട്​.

പുതിയ നിയമം അറിയാതെ തിങ്കളാഴ്​ച വൈകീട്ട്​ കോഴിക്കോടുനിന്നുള്ള ഗൾഫ്​ എയർ വിമാനത്തിൽ യാത്ര ചെയ്യാൻ എത്തിയ ഏതാനും പേരെ തിരിച്ചയച്ചു. തിങ്കളാഴ്​ച അർധരാത്രി കഴിഞ്ഞ്​ ബഹ്​റൈനിൽ എത്തുന്നതായതിനാലാണ്​ ഇൗ വിമാനത്തിലെ യാത്രക്കാർക്കും നിബന്ധന ബാധകമാക്കിയത്​.

161 പേരാണ്​ ഇൗ വിമാനത്തിൽ യാത്ര ചെയ്യാൻ ടിക്കറ്റ്​ എടുത്തിരുന്നത്​. ഇതിൽ നാല്​ കുട്ടികൾക്ക്​​ സർട്ടിഫിക്കറ്റ്​ ഇല്ലാത്തതും മൂന്ന്​ യാത്രക്കാർക്ക്​ നെഗറ്റീവ്​ സർട്ടിഫിക്കറ്റി​െൻറ 48 മണിക്കൂർ സമയപരിധി കടന്നുപോയതുമാണ്​ പ്രശ്​നമായത്​. കണ്ണീരോടെയാണ്​ പലരും വിമാനത്താവളത്തിൽനിന്ന്​ തിരിച്ചുപോയതെന്ന്​ ബഹ്​റൈനിലേക്കുള്ള യാത്രക്കാരിലൊരാൾ ഗൾഫ്​ മാധ്യമത്തോട്​ പറഞ്ഞു.

കോവിഡ്​ കേസുകൾ ഉയരുന്ന സാഹചര്യത്തിലാണ്​ ഇന്ത്യ, പാകിസ്​താൻ, ബംഗ്ലാദേശ്​ എന്നിവിടങ്ങളിൽനിന്നുള്ള യാത്രക്കാർക്ക്​ നെഗറ്റീവ്​ കോവിഡ്​ സർട്ടിഫിക്കറ്റ്​ ഇന്ന്​ മുതൽ നിർബന്ധമാക്കിയത്​. യാത്ര പുറപ്പെടുന്നതിന്​ മുമ്പ്​ 48 മണിക്കുറിനുള്ളിൽ എടുത്ത നെഗറ്റീവ്​ സർട്ടിഫിക്കറ്റാണ്​ വേണ്ടത്​. സർട്ടിഫിക്കറ്റിൽ ക്യൂ.ആർ കോഡും ഉണ്ടായിരിക്കണം. എയർ ഇന്ത്യ, എയർ ഇന്ത്യ എക്​സ്​പ്രസ്​ വിമാനങ്ങളിലും കുട്ടികൾക്കുൾപ്പെടെ നെഗറ്റീവ്​ സർട്ടിഫിക്കറ്റ്​​ വേണമെന്ന നിബന്ധന പ്രാബല്യത്തിൽ വരുത്തിയിട്ടുണ്ട്​.

കുട്ടികൾക്ക്​ കോവിഡ്​ പരിശോധന വേണോ എന്ന കാര്യത്തിൽ യാത്രക്കാർക്കിടയിൽ ആശയക്കുഴപ്പം നിലനിന്നിരുന്നു. ബഹ്​റൈൻ ആരോഗ്യ മന്ത്രാലയത്തി​െൻറ ഒരു അറിയിപ്പിൽ ആറ്​ വയസ്സിന്​ മുകളിലുള്ള എല്ലാ യാത്രക്കാരും സർട്ടിഫിക്കറ്റ്​ ഹാജരാക്കണം എന്നാണ്​ പറഞ്ഞിരിക്കുന്നത്​. അതേസമയം, എയർലൈൻസുകൾ ട്രാവൽ ഏജൻസികൾക്ക്​ നൽകിയ അറിയിപ്പിൽ എല്ലാ യാത്രക്കാർക്കും പരി​ശോധന വേണമെന്ന്​ വ്യക്​തമാക്കിയിരുന്നു.

ഗൾഫ്​ എയർ കോഴിക്കോ​െട്ട​ ട്രാവൽ ഏജൻസികൾക്ക്​ നൽകിയ അറിയിപ്പിൽ കുട്ടികളും ശിശുക്കളും ഉൾപ്പെടെ എല്ലാ യാത്രക്കാരും സർട്ടിഫിക്കറ്റ്​ ഹാജരാക്കണമെന്ന്​ വ്യക്​തമായി പറഞ്ഞിട്ടുണ്ട്​. ബഹ്​റൈൻ എയർപോർട്ടി​െൻറ ട്വിറ്റർ അക്കൗണ്ടിലും എല്ലാ യാത്രക്കാർക്കും നെഗറ്റീവ്​ സർട്ടിഫിക്കറ്റ്​ വേണമെന്ന്​ വ്യക്​തമാക്കിയിട്ടുണ്ട്​.

ഇന്ത്യയിൽനിന്നുള്ള യാത്രക്കാർക്ക്​ യു.എ.ഇ വിലക്കേർപ്പെടുത്തിയതോടെ അതുവഴി ബഹ്​റൈനിലേക്ക്​ വരാനുള്ള സാധ്യത അടഞ്ഞിരിക്കുകയാണ്​. ഇതോടെ, ബഹ്​റൈനിലേക്ക്​ ടിക്കറ്റ്​ നിരക്കും ഉയർന്നു. കോഴിക്കോട്ടുനിന്ന്​ മെയ്​ 10നാണ്​ നിലവിൽ ടിക്കറ്റ്​ ലഭ്യമായിട്ടുള്ളത്​. 296 ദിനാറാണ്​ ഇതിൽ ടിക്കറ്റ്​ നിരക്ക്​.