സ്​മരണകൾ മുറുകെ പിടിക്കുക –സമദാനി

മനാമ: പെറ്റമ്മയെ പുറന്തള്ളുന്ന ഒരു സമൂഹവും  മാതൃരാജ്യത്തെ കാത്തുസൂക്ഷിക്കുമെന്ന്​ കരുതാന്‍ കഴിയില്ലെന്ന്​ പ്രഭാഷകനും മുന്‍ എം.പിയുമായ അബ്​ദുസമദ് സമദാനി പറഞ്ഞു.ബഹ്‌റൈന്‍ കെ.എം.സി.സി കേരളീയ സമാജം ഹാളില്‍ സംഘടിപ്പിച്ച ഇന്ത്യന്‍ സ്വാതന്ത്ര്യ ദിന പരിപാടിയില്‍ ‘നാനാത്വത്തില്‍ ഏകത്വം’ എന്ന വിഷയത്തില്‍ പ്രഭാഷണം നടത്തുകയായിരുന്നു അദ്ദേഹം. മാസങ്ങള്‍ കഴിഞ്ഞ് വീട്ടിലെത്തുന്ന മക്കള്‍ അസ്ഥിക്കൂടമായി മാറിയ അമ്മയെയാണ്​ കാണുന്നത്. സമൂഹം മനസാക്ഷിയില്ലാത്ത അവസ്ഥയിലേക്കു മാറിയിരിക്കുന്നു. രാജ്യം കാത്തുസൂക്ഷിച്ച പാരമ്പര്യം മറക്കാന്‍ പാടില്ല. മറവി സമൂഹത്തിനാകെ പിടിപെടുമ്പോഴുള്ള അവസ്ഥയിലേക്കാണ്​ നാം സഞ്ചരിക്കുന്നത്.  

നാനാത്വത്തില്‍ ഏകത്വമെന്ന ഇന്ത്യയുടെ മഹിതമായ പാരമ്പര്യം നിലനിര്‍ത്താന്‍ ഭൂതകാല സ്മരണകള്‍ ആവശ്യമാണ്. അത്​ മുറുകെ പിടിക്കണമെന്ന്​ അദ്ദേഹം പറഞ്ഞു. കേരളീയ സമാജം പ്രസിഡൻറ്​ പി.വി.രാധാകൃഷ്ണപിള്ള ഉദ്ഘാടനം ചെയ്തു. കെ.എം.സി.സി പ്രസിഡൻറ്​ എസ്.വി.ജലീല്‍ അധ്യക്ഷത വഹിച്ചു. 
സേവി മാത്തുണ്ണി ആശംസകള്‍ അര്‍പ്പിച്ചു. ജന. സെക്രട്ടറി അസൈനാര്‍ കളത്തിങ്ങല്‍ സ്വാഗതം പറഞ്ഞു. ഒ.​െഎ.സി.സി ഗ്ലോബല്‍ ജന. സെക്രട്ടറി രാജു കല്ലുമ്പുറം, യു.എ. ഇ എക്‌സ്‌ചേഞ്ച് പ്രതിനിധി  രംഗനാഥ്, ഇന്ത്യന്‍ സ്‌കൂള്‍ ആക്ടിങ്​ ചെയര്‍മാന്‍ മുഹമ്മദ് ഇഖ്ബാല്‍ എന്നിവര്‍ സംബന്ധിച്ചു.