ഇന്ന്​ മുതൽ വീണ്ടും ചെമ്മീൻ കാലം

മനാമ: മാർച്ച്​ 15 മുതൽ തുടങ്ങിയ ചെമ്മീൻ ട്രോളിങ്​ നിരോധന കാലം ഇന്നലെ അവസാനിച്ചു. ഇതോടെ ഇന്ന്​ മുതൽ വിപണിയിൽ ചെമ്മീൻ ലഭ്യമാകും. ഇത്തവണ ആറുമാസത്തേക്കാണ്​ ആദ്യം ട്രോളിങ്​ നിരോധനം പ്രഖ്യാപിച്ചതെങ്കിലും പ്രാദേശിക മത്സ്യബന്ധന തൊഴിലാളികളുടെ നിരന്തര അഭ്യർഥന മാനിച്ച്​ അത്​ നാലുമാസമ​ായി ചുരുക്കുകയായിരുന്നു. പ്രധാനമന്ത്രി പ്രിൻസ്​ ഖലീഫ ബിൻ സൽമാൻ ആൽ ഖലീഫയാണ്​ ഇതുസംബന്ധിച്ച തീരുമാനമെടുത്തത്​. ദീർഘകാലത്തെ നിരോധനം തങ്ങളുടെ ജീവിതോപാധിയെ സാരമായി ബാധിക്കുമെന്നാണ്​ തൊഴിലാളികൾ പറഞ്ഞത്​. നിയമം ലംഘിച്ച്​ ചെമ്മീൻ പിടിക്കുന്ന പ്രശ്​നവും അവർ ഉയർത്തിയിരുന്നു. തുടർന്ന്​ മന്ത്രിസഭ യോഗത്തിലാണ്​ പ്രധാനമന്ത്രി നിരോധന കാലം ചുരുക്കാൻ നിർദേശം നൽകിയത്​. അടുത്ത ചെമ്മീൻ ബന്ധന നിരോധന കാലം മറ്റ്​ ജി.സി.സി രാജ്യങ്ങൾ പ്രഖ്യാപിക്കുന്ന ​അതേ വേളയിലാണ്​ നടപ്പാക്കുക.