വിദ്യാഭ്യാസ രംഗത്തിന്​ പ്രമുഖ പരിഗണന –ഗവർണർ

മനാമ: വിദ്യാഭ്യാസ ​രംഗത്തിന്​ ഭരണനേതൃത്വം വലിയ പ്രാധാന്യമാണ്​ നൽകുന്നതെന്നും ഇത്​ സുസ്​ഥിര വികസന പദ്ധതിയുടെ അവിഭാജ്യ ഘടകമാണെന്നും സതേൺ ഗവർണർ ശൈഖ്​ ഖലീഫ ബിൻ അലി ആൽ ഖലീഫ പറഞ്ഞു. വിദ്യാഭ്യാസ മന്ത്രി ഡോ. മാജിദ്​ ബിൻ അലി അൽനു​െഎമിയോടൊപ്പം അൽ ഫത്താഹ്​ സെക്കൻററി സ്​കൂൾ സന്ദർശിച്ച്​ സംസാരിക്കുകയായിരുന്നു അദ്ദേഹം. പുതിയ അക്കാദമിക്​ വർഷത്തേക്കായി വിദ്യാഭ്യാസ മന്ത്രാലയം നടത്തുന്ന ഒരുക്കങ്ങൾ വിദ്യാഭ്യാസ മന്ത്രി വിശദീകരിച്ചു. സതേൺ ഗവർണറേറ്റിലെ വിദ്യാർഥികൾക്ക്​ നൽകി വരുന്ന സേവനങ്ങളെക്കുറിച്ചും വിശദമാക്കി. സതേൺ ഗവർണറേറ്റിൽ നഗരവത്​കരണം ഉൾപ്പെടെ വലിയ മാറ്റങ്ങൾ വരുന്ന സമയമാണിതെന്ന്​ ഗവർണർ പറഞ്ഞു. അതിനാൽ വിവിധ മേഖലകളിൽ ഇതിനനുസരിച്ചുള്ള പദ്ധതികൾ സർക്കാർ നിർദേശങ്ങളനുസരിച്ച്​ ആവിഷ്​കരിക്കേണ്ടതാണെന്ന്​ അദ്ദേഹം കൂട്ടിച്ചേർത്തു.