ഐ.സി.ആർ.എഫ് ഫേബർ കാസ്റ്റൽ സ്പെക്ട്ര 2022 ഡിസംബർ ഒമ്പതിന്
text_fieldsമനാമ: ബഹ്റൈനിൽ സ്കൂൾ വിദ്യാർഥികൾക്കായുള്ള ഏറ്റവും വലിയ കലാമത്സരമായ ഫേബർ കാസ്റ്റൽ സ്പെക്ട്ര 2022 ഈ വർഷം ഡിസംബർ ഒമ്പതിന് ഈസ ടൗൺ ഇന്ത്യൻ സ്കൂളിൽ നടക്കുമെന്ന് ഭാരവാഹികൾ വാർത്തസമ്മേളനത്തിൽ അറിയിച്ചു. കുട്ടികളുടെയും യുവാക്കളുടെയും കലാപരമായ കഴിവുകൾ പ്രോത്സാഹിപ്പിക്കുക എന്ന ലക്ഷ്യത്തോടെയാണ് ഇന്ത്യൻ എംബസിയുടെ കീഴിൽ പ്രവർത്തിക്കുന്ന ഇന്ത്യൻ കമ്യൂണിറ്റി റിലീഫ് ഫണ്ട് (ഐ.സി.ആർ.എഫ്) മത്സരം സംഘടിപ്പിക്കുന്നത്.
തുടർച്ചയായ 14ാം വർഷമാണ് ആർട്ട് കാർണിവൽ സംഘടിപ്പിക്കുന്നത്. കോവിഡ് പകർച്ചവ്യാധി കാരണം കഴിഞ്ഞ രണ്ട് വർഷമായി ഓൺലൈനിലാണ് മത്സരം നടത്തിയത്.
രാജ്യത്തെ വിവിധ സ്കൂളുകളിൽ സംഘടിപ്പിക്കുന്ന പ്രാഥമിക റൗണ്ടിൽ തിരഞ്ഞെടുക്കപ്പെടുന്ന കുട്ടികളാണ് മത്സരത്തിൽ പങ്കെടുക്കുന്നത്. അഞ്ചുമുതൽ എട്ട് വയസ്സുവരെ, എട്ടുമുതൽ 11 വയസ്സ് വരെ, 11 മുതൽ 14 വയസ്സുവരെ, 14 മുതൽ 18 വയസ്സുവരെ എന്നിങ്ങനെ നാല് പ്രായ ഗ്രൂപ്പുകളായി തിരിച്ചാണ് മത്സരം നടത്തുന്നത്. സ്കൂളുകൾ/സ്ഥാപനങ്ങൾ വഴി മാത്രമേ പങ്കാളിത്തം അനുവദിക്കൂ. ബഹ്റൈനിൽ പങ്കെടുക്കുന്ന എല്ലാവർക്കും ഡ്രോയിങ് പേപ്പറും മെറ്റീരിയലുകളും സൗജന്യമായി നൽകും.
ഓരോ വിഭാഗത്തിലെയും ആദ്യ മൂന്ന് വിജയികൾക്ക് വ്യക്തിഗത ട്രോഫികളും സർട്ടിഫിക്കറ്റുകളും ലഭിക്കും. കൂടാതെ എല്ലാ പങ്കാളികൾക്കും പങ്കാളിത്ത സർട്ടിഫിക്കറ്റ് ലഭിക്കും. 2023ലേക്ക് രൂപകൽപന ചെയ്ത വാൾ കലണ്ടറുകളിലും ഡെസ്ക് ടോപ് കലണ്ടറുകളിലും കുട്ടികളുടെ വിജയിക്കുന്ന എൻട്രികളും മറ്റ് മികച്ച സൃഷ്ടികളും ഉൾപ്പെടുത്തും. ഈ കലണ്ടറുകൾ 2022 ഡിസംബർ 30ന് നടക്കുന്ന ചടങ്ങിൽ പ്രകാശനം ചെയ്യും.
രണ്ടാമത്തെ ഇന്റർനാഷനൽ ഓൺലൈൻ മത്സരവും ഇതോടൊപ്പം നടക്കും. രണ്ട് മത്സരങ്ങളും വെവ്വേറെ നടത്തുകയും രണ്ട് സെറ്റ് വിജയികളെ പ്രഖ്യാപിക്കുകയും ചെയ്യും. അന്താരാഷ്ട്ര സ്പെക്ട്ര മത്സരം ഡിസംബർ 11ന് വെർച്വൽ പ്ലാറ്റ്ഫോമിൽ നടക്കും. കഴിഞ്ഞ വർഷം 17 രാജ്യങ്ങളിലെ 80 സ്കൂളുകളിൽ നിന്നുള്ള 550ലധികം കുട്ടികൾ ഓൺലൈനിൽ നടത്തിയ കലാമത്സരത്തിൽ പങ്കെടുത്തു.
ബഹ്റൈനിൽ മരണമടഞ്ഞ, പ്രതിമാസം 100 ബഹ്റൈനി ദിനാറിൽ താഴെ വേതനം ലഭിക്കുന്ന ഇന്ത്യൻ തൊഴിലാളികളുടെ കുടുംബങ്ങളെ സഹായിക്കുന്നതിനാണ് മത്സരത്തിൽനിന്നുള്ള വരുമാനം ഉപയോഗിക്കുന്നത്. മരിച്ച ഇന്ത്യക്കാരന്റെ ആശ്രിതർക്ക് ലക്ഷം രൂപ വീതമാണ് ധനസഹായം നൽകുന്നത്. സ്പെക്ട്ര 2022നെ കുറിച്ചുള്ള കൂടുതൽ വിവരങ്ങൾക്ക് കൺവീനർ അനീഷ് ശ്രീധരൻ (39401394), ജോ. കൺവീനർ നിഥിൻ (39612819), മുരളീകൃഷ്ണൻ (34117864) എന്നിവരെ ബന്ധപ്പെടാം. icrfbahrain@gmail.com എന്ന ഇ-മെയിൽ വിലാസത്തിലും ബന്ധപ്പെടാം. ഐ.സി.ആർ.എഫ് ചെയർമാൻ ഡോ. ബാബു രാമചന്ദ്രൻ, ജനറൽ സെക്രട്ടറി പങ്കജ് നല്ലൂർ, വൈസ് ചെയർമാൻ അഡ്വ. വി.കെ തോമസ്, അഡ്വൈസർ അരുൾദാസ് തോമസ്, ഭഗവാൻ അസർപോട്ട, സ്പെക്ട്ര കൺവീനർ അനീഷ് ശ്രീധരൻ, ട്രഷറർ മണി ലക്ഷ്മണമൂർത്തി, ഫേബർ കാസ്റ്റൽ കൺട്രി ഹെഡ് സഞ്ജയ് ബാൻ, സ്പെക്ട്ര ജോ. കൺവീനർമാരായ മുരളീകൃഷ്ണൻ, നിതിൻ ജേക്കബ്, ടീം മെംബർ സുനിൽ കുമാർ എന്നിവർ വാർത്തസമ്മേളനത്തിൽ പങ്കെടുത്തു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.