​െഎ.സി.‌ആർ‌.എഫ് കുപ്പിവെള്ളവും പഴങ്ങളും വിതരണം ചെയ്​തു

മനാമ: ഇന്ത്യൻ കമ്യൂണിറ്റി റിലീഫ് ഫണ്ട് (ഐ.സി.‌ആർ‌.എഫ്) 130 ഓളം തൊഴിലാളികൾക്ക് കുപ്പിവെള്ളവും പഴങ്ങളും വിതരണം ചെയ്​തു. മനാമയിലെ അൽഗാന കമ്പനിയുടെ ബെൽഹാമർ വർക്ക് സൈറ്റിലായിരുന്നു വിതരണം. കോവിഡ് -19 സമയത്ത് പാലിക്കേണ്ട മുൻകരുതലുകളെക്കുറിച്ചുള്ള​ നിർദേശങ്ങളും മാസ്​ക്കുകളും ആൻറി ബാക്​ടീരിയൽ സോപ്പുകളും ഐ.സി.‌ആർ‌.എഫ് വളൻറിയർമാർ വിതരണം ചെയ്​തു. ഇതോടൊപ്പം, എസ്.ടി.സി കമ്പനി സ്പോൺസർ ചെയ്​ത സൗജന്യ പ്രീപെയ്​ഡ്​ സിം കാർഡുകളും എല്ലാ തൊഴിലാളികൾക്കും നൽകി.

തൊഴിലാളികളെ കുടിവെള്ളത്തി​​െൻറ പ്രാധാന്യത്തെക്കുറിച്ചും വേനൽകാലത്ത് ആരോഗ്യം എങ്ങനെ സംരക്ഷിക്കാമെന്നതിനെക്കുറിച്ചും ബോധവത്​കരിക്കുകയാണ്​ പരിപാടിയുടെ മുഖ്യലക്ഷ്യം. ആഗസ്​റ്റ്​ അവസാനം വരെ പ്രതിവാര പരിപാടി തുടരാനാണ്​ ഉദ്ദേശിക്കുന്നതെന്ന്​ ഐ.സി.‌ആർ‌.എഫ് ഭാരവാഹികൾ അറിയിച്ചു. ഐ.സി.ആർ.എഫ്. ചെയർമാൻ അരുൾദാസ് തോമസ്, ജനറൽ സെക്രട്ടറി ജോൺ ഫിലിപ്പ്, തേർസ്​റ്റ്​ ഖ്വഞ്ചേഴ്​സ്​ കൺവീനർ സുധീർ തിരുനിലത്ത്, വളൻറിയർമാരായ ശിവകുമാർ, ക്ലിഫോർഡ് കൊറിയ, സുനിൽ കുമാർ, മുരളീകൃഷ്​ണൻ, നാസർ മഞ്ചേരി, പവിത്രൻ നീലേശ്വരം എന്നിവർ പങ്കെടുത്തു.