ഇന്ത്യൻ എംബസി ഒാപൺ ഹൗസ്​

നിരവധി പ്രശ്​നങ്ങൾക്ക്​ പരിഹാരം

കോവിഡ്​ മുൻകരുതലുകൾ പാലിക്കണമെന്ന്​ അംബാസഡർ ഒാർമിപ്പിച്ചു

മനാമ: പ്രവാസി ഇന്ത്യൻ സമൂഹത്തി​െൻറ വിവിധ പ്രശ്​നങ്ങൾക്ക്​ പരിഹാരം കാണുന്നതിന്​ ഇന്ത്യൻ എംബസിയുടെ ആഭിമുഖ്യത്തിൽ വെർച്വൽ ഒാപൺ ഫോറം സംഘടിപ്പിച്ചു. കോവിഡ്​ നിയന്ത്രണ ഭാഗമായാണ്​ പ്രതിമാസ ഒാപൺ ഹൗസ്​ ഒാൺലൈനിൽ നടത്തുന്നത്​. പ്രവാസികളുടെ തൊഴിൽപരമായ വിവിധ പ്രശ്​നങ്ങൾക്ക്​ ഒാപൺ ഹൗസിൽ പരിഹാരം കണ്ടു.

ഇന്ത്യയും ബഹ്​റൈനും തമ്മിൽ നയതന്ത്രബന്ധം ആരംഭിച്ചതി​െൻറ സുവർണ ജൂബിലിയോടനുബന്ധിച്ച്​ ഒരാഴ്​ച നീളുന്ന ആഘോഷ പരിപാടികൾ സംഘടിപ്പിച്ചതിന്​ ബഹ്​റൈൻ അധികൃതർക്ക്​ ഇന്ത്യൻ അംബാസഡർ പീയൂഷ്​ ശ്രീവാസ്​തവ നന്ദി പറഞ്ഞു. ബഹ്​റൈൻ സാംസ്​കാരിക, പുരാവസ്​തു അതോറിറ്റിയുടെ ആഭിമുഖ്യത്തിലാണ്​ ഒക്​ടോബർ 12 മുതൽ 19 വരെ ബാബുൽ ബഹ്​റൈൻ ഉൾപ്പെടെ വിവിധ ​വേദികളിൽ ആഘോഷ പരിപാടികൾ സംഘടിപ്പിച്ചത്​. ഇരു രാജ്യങ്ങളുടെയും കല, സാംസ്​കാരിക പാരമ്പര്യങ്ങൾ വിളിച്ചോതുന്ന നിരവധി പരിപാടികൾ ലിറ്റിൽ ഇന്ത്യ ബഹ്​റൈൻ ആഘോഷ ഭാഗമായി അരങ്ങേറി. ചരിത്ര സ്​മാരകങ്ങളായ ബഹ്​റൈനിലെ ബാബുൽ ബഹ്​റൈൻ ഇന്ത്യൻ ദേശീയ പതാകയുടെയും ഇന്ത്യയിലെ കുത്തബ്​മിനാർ ബഹ്​റൈൻ ദേശീയ പതാകയുടെയും നിറങ്ങളാൽ അലംകൃതമാവുകയും ചെയ്​തു. ആഘോഷ പരിപാടികളിൽ സജീവമായി പ​െങ്കടുത്ത ഇന്ത്യൻ, ബഹ്​റൈനി സമൂഹങ്ങൾക്കും അംബാസഡർ നന്ദി രേഖപ്പെടുത്തി. കോവിഡുമായി ബന്ധപ്പെട്ട ഇന്ത്യയിലെ പുതിയ സംഭവ വികാസങ്ങൾ അംബാസഡർ ഒാപൺ ഹൗസിൽ അറിയിച്ചു. 100 കോടി വാക്​സിൻ ഡോസ്​ നൽകി ഇന്ത്യ ചരിത്രം കുറിച്ചത്​ അടുത്ത കാലത്താണ്​. ടൂറിസ്​റ്റ്​ ഇ-വിസ നൽകുന്നത്​ ഒക്​ടോബർ 15 മുതൽ ഇന്ത്യ പുനരാരംഭിച്ച കാര്യവും അംബാസഡർ അറിയിച്ചു.ഏതാനും ഇന്ത്യൻ പ്രവാസികളുടെ ദീർഘകാലമായുള്ള കേസുകൾ പരിഹരിക്കാൻ സഹായം ചെയ്​ത ബഹ്​റൈൻ അധികൃതർക്കും ബന്ധപ്പെട്ട ഇന്ത്യൻ അസോസിയേഷനുകൾക്കും അംബാസഡർ നന്ദി പറഞ്ഞു. അശോകൻ ആശാരി, സായിറാം സാപ, ഗംഗാധർ പശികം, അവ്വമ്മ എന്നിവരുടെ കേസുകൾക്കാണ്​ പരിഹാരമായത്​. ഇവരെ ഇന്ത്യയിലേക്ക്​ തിരിച്ചയക്കുകയും ചെയ്​തു. കോവിഡ്​ നിയന്ത്രണങ്ങളിൽ ഇളവ്​ വരുത്തിയിട്ടു​ണ്ടെങ്കിലും മുൻകരുതൽ നിർദേശങ്ങൾ പാലിക്കുന്നതിൽ വീഴ്​ച പാടില്ലെന്നും അദ്ദേഹം ഒാർമിപ്പിച്ചു.