നാലുപേരുടെ വധശിക്ഷ ഹമദ്​ രാജാവ്​ ജീവപര്യന്തമാക്കി ഉത്തരവിട്ടു

മനാമ:   ഭീകരപ്രവർത്തനത്തി​​​െൻറ പേരിൽ  വധശിക്ഷയ്ക്ക് വിധിക്കപ്പെട്ട  നാലുപേരുടെ ശിക്ഷ രാജാവ്​ ഹമദ്​ ബിൻ ഇൗസ ആൽ ഖലീഫ ജീവപര്യന്തമാക്കി ഇളവ്​ ചെയ്​തു. മുഹമ്മദ്  അബ്​ദുൽ ഹുസൈൻ അഹ്മദ് അൽ മിത് ഗാവി, ഫാദിൽ അൽ സയ്യദ്​ അബ്ബാസ് ഹസൻ​ റാദി, അൽ സയദ്​ അലവി ഹുസയിൻ അലവി, മുബാറക്​ ആദിൽ മുബാറക്​ മുഹന എന്നിവരുടെ​ വധശിക്ഷയാണ്​ രാജാവ് ഒഴിവാക്കി ഉത്തരവിട്ടത്​. കഴിഞ്ഞ ഡിസംബർ 25 നാണ്​ സൈനിക കോടതി ആറ​ുപേർക്ക്​ വധശിക്ഷയും ബാക്കിയുള്ളവർക്ക്​ ജീവപര്യന്തവും ഉൾപ്പെടെ 13 പേർക്ക്​ ശിക്ഷ വിധിച്ചിരുന്നത്​.  

ശിക്ഷക്ക്​  എതിരായി സൈനിക വിചാരണകോടതിയിൽ പ്രതികൾ അന്തിമ അപ്പീലുകൾ സമർപ്പിക്കുകയായിരുന്നു. ഇത്​ കഴിഞ്ഞ ദിവസം കോടതി തള്ളുകയും വധശിക്ഷക്ക്​ വിധിക്കപ്പെട്ട ആറുപേരിൽ നാലുപേർക്ക്​ വധശിക്ഷ ശരിവെക്കുകയുമായിരുന്നു.  എന്നാൽ രാജാവി​​​െൻറ അന്തിമ ഉത്തരവ്​ അനുസരിച്ചായിരിക്കും ശിക്ഷയിൽ തീരുമാനം ഉണ്ടാകുക എന്ന്​ കോടതി വ്യക്തമാക്കിയിരുന്നു. വധശിക്ഷ ജീവപര്യന്തമാക്കി ഇളവ്​ ചെയ്​തതിന്​ കുറ്റവാളികളുടെ ബന്​ധുക്കൾ ഹമദ്​ രാജാവിന്​ നന്ദി അറിയിച്ചു.