മു​ഹ​റ​ഖ് സൂ​ഖ് മു​ഖം മി​നു​ക്കു​ന്നു; ച​രി​ത്ര പ്രൗ​ഢി നി​ല​നി​ർ​ത്തും

മ​നാ​മ: നൂ​റ്റാ​ണ്ടു​ക​ളു​ടെ ച​രി​ത്രം പേ​റു​ന്ന ബ​ഹ്‌​റൈ​നി​ലെ പ​ഴ​ക്ക​മേ​റി​യ വ്യാ​പാ​ര​കേ​ന്ദ്ര​മാ​യ മു​ഹ​റ​ഖ് സൂ​ഖി​ന് പു​തു​മു​ഖം ന​ൽ​കാ​നൊ​രു​ങ്ങി സ​ർ​ക്കാ​ർ. പ​വി​ഴ ഖ​ന​ന​ത്തി​ന്റെ​യും വ്യാ​പാ​ര​ത്തി​ന്റെ​യും ച​രി​ത്ര​സ്മ​ര​ണ​ക​ൾ ത​ങ്ങി​നി​ൽ​ക്കു​ന്ന പു​രാ​ത​ന ന​ഗ​ര​ത്തി​ന്റെ പാ​ര​മ്പ​ര്യ​വും പ​കി​ട്ടും നി​ല​നി​ർ​ത്തി​ക്കൊ​ണ്ടു​ള്ള ന​വീ​ക​ര​ണ പ​രി​പാ​ടി​ക​ളാ​ണ് ന​ട​ത്തു​ന്ന​ത്.

ആ​ദ്യ ഘ​ട്ട​മാ​യി പു​തി​യ ന​ട​പ്പാ​ത​ക​ൾ 4,07,287 ദീ​നാ​ർ ചെ​ല​വി​ട്ട് ഉ​ട​ൻ നി​ർ​മി​ക്കും. ന​ഗ​ര സൗ​ന്ദ​ര്യ​വ​ത്ക​ര​ണ​ത്തി​നും പാ​ത​യോ​ര​ങ്ങ​ളി​ൽ മ​ര​ങ്ങ​ള​ട​ക്കം വെ​ച്ചു​പി​ടി​പ്പി​ച്ച് പ​ച്ച​പ്പ് കൊ​ണ്ടു​വ​രു​ന്ന​തി​നു​മാ​യി 5,97,120 ദീ​നാ​ർ വ​ക​യി​രു​ത്തി​യി​ട്ടു​ണ്ട്. വാ​ട്ട​ർ പൈ​പ്പു​ക​ൾ മാ​റ്റി​സ്ഥാ​പി​ക്കു​ന്ന​തി​ന് 12,850 ദീ​നാ​റും പു​തി​യ ലൈ​റ്റി​ങ് സം​വി​ധാ​ന​ങ്ങ​ൾ​ക്കാ​യി 20,280 ദീ​നാ​റും നീ​ക്കി​വെ​ച്ചി​ട്ടു​ണ്ട്. പൊ​തു​മ​രാ​മ​ത്ത് മ​ന്ത്രാ​ല​യ​ത്തി​ന്റെ സ​ഹ​ക​ര​ണ​ത്തോ​ടെ​യാ​ണ് പ​ദ്ധ​തി ന​ട​പ്പാ​ക്കു​ന്ന​ത്. ബ​ഹ്‌​റൈ​ൻ അ​തോ​റി​റ്റി ഫോ​ർ ക​ൾ​ച​ർ ആ​ൻ​ഡ് ആ​ന്‍റി​ക്വി​റ്റീ​സും പ​ദ്ധ​തി​യി​ൽ സ​ഹ​ക​രി​ക്കും.

ച​രി​ത്ര​മു​റ​ങ്ങു​ന്ന സൂ​ഖാ​ണെ​ങ്കി​ലും പൊ​തു ടോ​യ്‌​ല​റ്റു​ക​ൾ ഇ​ല്ലാ​തി​രു​ന്ന​ത് പ​ല​രും ചൂ​ണ്ടി​ക്കാ​ട്ടി​യി​രു​ന്നു. സ​ന്ദ​ർ​ശ​ക​രും വ്യാ​പാ​രി​ക​ളും സ​മീ​പ​ത്തു​ള്ള റ​സ്റ്റാ​റ​ന്റു​ക​ളി​ലോ ക​ഫേ​ക​ളി​ലോ ല​ഭ്യ​മാ​യ സൗ​ക​ര്യ​ങ്ങ​ളാ​ണ് ഉ​പ​യോ​ഗി​ച്ചി​രു​ന്ന​ത്.

ഈ ​പ്ര​ശ്നം ഗൗ​ര​വ​മാ​യി എ​ടു​ത്ത് പൊ​തു ടോ​യ്‍ല​റ്റു​ക​ൾ അ​ടി​യ​ന്ത​ര​മാ​യി കൊ​ണ്ടു​വ​രു​മെ​ന്ന് അ​ധി​കൃ​ത​ർ അ​റി​യി​ച്ചു. പാ​ർ​ക്കി​ങ് സൗ​ക​ര്യ​ത്തി​ന്റെ അ​പ​ര്യാ​പ്ത​ത​യും ജ​ന​പ്ര​തി​നി​ധി​ക​ള​ട​ക്കം ചൂ​ണ്ടി​ക്കാ​ണി​ച്ചി​രു​ന്നു. ഈ ​പ്ര​ശ്ന​വും ബ​ന്ധ​പ്പെ​ട്ട സ​ർ​ക്കാ​ർ വ​കു​പ്പു​ക​ളു​മാ​യി സ​ഹ​ക​രി​ച്ച് പ​രി​ഹ​രി​ക്കും.

പ്ര​ദേ​ശ​ത്ത് ഉ​ട​ൻ ത​ന്നെ ബ​ഹു​നി​ല കാ​ർ പാ​ർ​ക്കി​ങ് കേ​ന്ദ്രം സ്ഥാ​പി​ക്കു​മെ​ന്ന് വ​ർ​ക്സ് മി​നി​സ്ട്രി അ​സി​സ്റ്റ​ന്റ് അ​ണ്ട​ർ സെ​ക്ര​ട്ട​റി കാ​ദെം അ​ബ്ദു​ല്ല​ത്തീ​ഫ് കൗ​ൺ​സി​ല​ർ​മാ​രോ​ട് പ​റ​ഞ്ഞു. പ്രാ​യ​മാ​യ​വ​രെ​യും അം​ഗ​പ​രി​മി​ത​രെ​യും പ​രി​ഗ​ണി​ച്ചാ​യി​രി​ക്കും വി​ക​സ​ന പ​ദ്ധ​തി​ക​ൾ ന​ട​പ്പാ​ക്കു​ക. ശൈ​ഖ് ഹ​മ​ദ് അ​വ​ന്യൂ​വി​ന്റെ വി​പു​ലീ​ക​ര​ണ​മാ​യ ശൈ​ഖ് അ​ബ്ദു​ല്ല അ​വ​ന്യൂ​വും ന​വീ​ക​ര​ണ പ​ദ്ധ​തി​യു​ടെ ഭാ​ഗ​മാ​യി വി​ക​സി​പ്പി​ക്കു​ന്നു​ണ്ട്.

സൂ​ഖി​ന് കു​റ​ഞ്ഞ​ത് 240 വ​ർ​ഷം പ​ഴ​ക്ക​മു​ണ്ടെ​ന്നാ​ണ് ബ​ഹ്‌​റൈ​ൻ ച​രി​ത്ര​കാ​ര​നാ​യ ഹു​സൈ​ൻ അ​ൽ മ​ഹ്ദി​യു​ടെ അ​ഭി​പ്രാ​യം. മ​നാ​മ​ക്കു​മു​മ്പ് മു​ഹ​റ​ഖാ​യി​രു​ന്നു രാ​ജ്യ ത​ല​സ്ഥാ​നം. ജി​ദ്ദ, ബ​സ്ര തു​ട​ങ്ങി​യ​വ​ക്കൊ​പ്പം മു​ഹ​റ​ഖും പ്ര​ധാ​ന വ്യാ​പാ​ര തു​റ​മു​ഖ​മാ​യി​രു​ന്നു​വെ​ന്നാ​ണ് ഗ​വേ​ഷ​ണ​ങ്ങ​ൾ തെ​ളി​യി​ക്കു​ന്ന​ത്.

പ്ര​ദേ​ശം ച​രി​ത്ര​സ്മാ​ര​ക​മെ​ന്ന നി​ല​യി​ൽ സം​ര​ക്ഷി​ക്ക​പ്പെ​ടു​ന്നു​ണ്ടെ​ങ്കി​ലും അ​തി​ന്റെ യ​ഥാ​ർ​ഥ മൂ​ല്യം അ​ർ​ഹി​ക്കു​ന്ന രീ​തി​യി​ല​ല്ല ഇ​പ്പോ​ഴ​ത്തെ അ​വ​സ്ഥ​യെ​ന്ന് അ​ദ്ദേ​ഹം പ​റ​യു​ന്നു. പു​തി​യ ന​വീ​ക​ര​ണ പ​രി​പാ​ടി​ക​ൾ ച​രി​ത്ര​പ​ര​മാ​യ പാ​ര​മ്പ​ര്യ​ത്തി​ന്റെ സം​ര​ക്ഷ​ണ​ത്തി​ലൂ​ന്നി​യു​ള്ള​താ​യി​രി​ക്കു​മെ​ന്നാ​ണ് പ്ര​തീ​ക്ഷി​ക്ക​പ്പെ​ടു​ന്ന​ത്. യു​നെ​സ്കോ അം​ഗീ​ക​രി​ച്ച ച​രി​ത്ര​സ്മാ​ര​ക​മാ​യ പേ​ളി​ങ് പാ​ത്ത് അ​ട​ക്കം ഇ​വി​ടെ​യാ​ണ്. പു​രാ​ത​ന​മാ​യ കെ​ട്ടി​ട​ങ്ങ​ൾ അ​തേ പ​ടി നി​ല​നി​ർ​ത്തി​യി​ട്ടു​ണ്ട്. ഇ​വ​യൊ​ക്കെ വേ​ണ്ട​വി​ധം സം​ര​ക്ഷി​ച്ചാ​യി​രി​ക്കും വി​ക​സ​ന പ്ര​വ​ർ​ത്ത​ന​ങ്ങ​ൾ.

ക​ട​ക​ൾ അ​ട​ക്കാ​തെ​യും വ്യാ​പാ​ര​ത്തെ ബാ​ധി​ക്കാ​തെ​യു​മാ​യി​രി​ക്കും നി​ർ​മാ​ണ​പ്ര​വൃ​ത്തി​ക​ൾ. അ​ടി​സ്ഥാ​ന​സൗ​ക​ര്യ വി​ക​സ​ന പ്ര​വ​ർ​ത്ത​ന​ങ്ങ​ൾ ന​ട​ക്കു​മ്പോ​ൾ വ്യാ​പാ​രി​ക​ൾ​ക്ക് കു​റ​ച്ച് അ​സൗ​ക​ര്യ​ങ്ങ​ൾ വ​രു​ന്ന​ത് സ്വാ​ഭാ​വി​ക​മാ​ണ്. എ​ന്നാ​ൽ, ഭാ​വി​യി​ൽ എ​ല്ലാ​വ​ർ​ക്കും അ​ത് ഗു​ണ​ക​ര​മാ​കു​മെ​ന്നും മു​ഹ​റ​ഖ് മു​ൻ​സി​പ്പ​ൽ കൗ​ൺ​സി​ൽ ആ​ക്ടി​ങ് ചെ​യ​ർ​മാ​ൻ സ​ലേ ബു​ഹാ​സ പ​റ​ഞ്ഞു.