രക്ഷിതാക്കൾക്ക്​ താൽപര്യം വീട്ടിലിരുന്ന്​ പഠനം

മനാമ: സെപ്​റ്റംബർ 16 മുതൽ സ്​കൂളുകളിൽ അധ്യയനം പുനരാരംഭിക്കുമെന്ന്​ സർക്കാർ അറിയി​െച്ചങ്കിലും ഭൂരിഭാഗം വിദ്യാർഥികൾക്കും രക്ഷിതാക്കൾക്കും താൽപര്യം വീട്ടിലിരുന്നുള്ള പഠനം തന്നെ. കോവിഡ്​-19 സംബന്ധിച്ച ആശങ്ക രക്ഷിതാക്കളെ അലട്ടുന്നുണ്ടെന്നാണ്​ പ്രതികരണങ്ങൾ തെളിയിക്കുന്നത്​. സ്​കൂളുകളിലെ പഠനം ആരംഭിക്കുന്നുണ്ടെങ്കിലും ഒാൺലൈൻ, ഒാഫ്​ലൈൻ പഠനരീതികളിലൊന്ന്​ തിരഞ്ഞെടുക്കാൻ വിദ്യാഭ്യാസ മന്ത്രാലയം അനുവദിച്ചിട്ടുണ്ട്​.

രക്ഷിതാക്കളുടെയും വിദ്യാർഥികളുടെയും പ്രതികരണം അറിയാൻ വിദ്യാഭ്യാസ മന്ത്രാലയം സർവേ നടത്തുന്നുണ്ട്​. ഒാൺലൈൻ പഠനം വേണോ ഒാഫ്​ലൈൻ പഠനം വേണോ എന്ന ചോദ്യമാണ്​ ഇതിലുള്ളത്​. സ്​കൂളിലെത്തി നേരിട്ട് പഠനം നടത്താനുദ്ദേശിക്കുന്നവര്‍ക്ക് ആഴ്ചയില്‍ പരമാവധി രണ്ടു ദിവസമായിരിക്കും ക്ലാസ്​.

ബാക്കി ദിവസങ്ങളില്‍ ഓണ്‍ലൈനായിരിക്കും പഠനം. എന്നാൽ, രണ്ടുദിവസം തന്നെ സ്​കൂളിൽ പോകുന്ന കാര്യത്തിൽ രക്ഷിതാക്കൾക്ക്​ വിയോജിപ്പാണ്​. കുട്ടികൾക്ക്​ അടക്കം കോവിഡ്​ സ്ഥിരീകരിച്ച സാഹചര്യത്തിലാണ്​ രക്ഷിതാക്കളുടെ ആശങ്ക.

ഇന്ത്യൻ സ്​കൂൾ രക്ഷിതാക്കൾക്കും വിദ്യാർഥികൾക്കുമിടയിൽ നടത്തിയ സർവേയിൽ ​കേവലം രണ്ടു​ ശതമാനം മാത്രമാണ്​ സ്​കൂളിൽ പോയി പഠനം നടത്തുന്നതിന്​ താൽപര്യപ്പെട്ടത്​.

ക്ലാസ്​ മുറികളിലും സ്​കൂൾ പരിസരങ്ങളിലും കൂടക്കൂടെ അണുനശീകരണം, വിദ്യാർഥികൾക്കും അധ്യാപകർക്കും ​ജീവനക്കാർക്കും ഫേസ്​ മാസ്​ക്​ തുടങ്ങിയ മുൻകരുതലുകൾ എടുക്കുമെന്ന്​ മന്ത്രാലയം പറയുന്നുണ്ടെങ്കിലും രക്ഷിതാക്കൾക്ക്​ വിശ്വാസം പോര. മാസങ്ങളായി തുടരുന്ന ഒാൺലൈൻ വിദ്യാഭ്യാസം രക്ഷിതാക്കൾക്ക്​ പലതരത്തിലുള്ള ബുദ്ധിമുട്ടുകൾ സൃഷ്​ടിക്കുന്നുണ്ടെങ്കിലും ഇപ്പോഴത്തെ സാഹചര്യത്തിൽ മക്കളെ സ്​കൂളിലയക്കാൻ മിക്കവരും മടിക്കുകയാണ്​.

ചെറിയ കുട്ടികൾ മുൻകരുതലുകൾ എത്രത്തോളം പാലിക്കുമെന്നതിൽ അവർക്ക്​ ആശങ്കയുണ്ട്​. എന്തായാലും, ഒാൺലൈൻ/ഒാഫ്​ലൈൻ രീതികളിൽ ഒന്ന്​ തിരഞ്ഞെടുക്കാൻ അനുമതി നൽകിയത്​ രക്ഷിതാക്കൾക്ക്​ ആശ്വാസമാണ്​.

സെപ്റ്റംബര്‍ ആറുമുതല്‍ അധ്യാപകര്‍ സ്​കൂളുകളില്‍ ഹാജരാവുകയും 16 മുതല്‍ ക്ലാസുകള്‍ ആരംഭിക്കുകയും ചെയ്യുമെന്നാണ്​ വിദ്യാഭ്യാസ മന്ത്രാലയം ഇപ്പോൾ പ്രഖ്യാപിച്ചിട്ടുള്ളത്​.