പി.എൽ.ഒ നേതാവുമായി വിദേശകാര്യമന്ത്രിയുടെ ഫോൺ സംഭാഷണം

ദോഹ: ഫലസ്​തീനിലെ പുതിയ സാഹചര്യങ്ങൾ ചർച്ച ചെയ്യുന്നതിനായി ഉപപ്രധാനമന്ത്രിയും വിദേശകാര്യമന്ത്രിയുമായ ശൈഖ് മുഹമ്മദ് ബിൻ അബ്​ദുറഹ്മാൻ ആൽഥാനി ഫലസ്​തീൻ ലിബറേഷൻ ഓർഗനൈസേഷൻ എക്സിക്യൂട്ടിവ് കമ്മിറ്റി സെക്രട്ടറി ജനറൽ ഡോ. സാഇബ് ഇറാകാത്തുമായി ഫോൺ സംഭാഷണം നടത്തി.ഫലസ്​തീനിലെ രാഷ്​ട്രീയ സാഹചര്യങ്ങളും മേഖലയിലെയും അന്തർദേശീയ തലത്തിലെയും ഏറ്റവും പുതിയ സംഭവവികാസങ്ങളും ഇരു നേതാക്കളും വിശകലനം ചെയ്തു.

ഫലസ്​തീന് പിന്തുണ നൽകുന്ന നിലപാടാണ് ഖത്തറിന് എന്നും ഉള്ളതെന്നും ഫലസ്​തീൻ ജനതയുടെ അവകാശങ്ങൾ നേടിയെടുക്കുന്നതിന് ഖത്തറി​െൻറ ശക്തമായ പിന്തുണയുണ്ടാകുമെന്നും പി.എൽ.ഒ നേതാവിനെ വിദേശകാര്യമന്ത്രി അറിയിച്ചു. ജറൂസലം ആസ്​ഥാനമാക്കി 1967ലെ അതിർത്തികൾ പ്രകാരമുള്ള സ്വതന്ത്ര പരമാധികാര ഫലസ്​തീൻ രാഷ്​ട്ര സംസ്​ഥാപനത്തെ ഖത്തർ പിന്തുണക്കുന്നു. സമാധാന ശ്രമങ്ങളിലൂടെ മേഖലയിൽ സുസ്​ഥിര സമാധാനം പുനഃസ്​ഥാപിക്കണമെന്നും അദ്ദേഹം വ്യക്തമാക്കി.ഫലസ്​തീൻ പ്രവിശ്യകളിലെ ഇസ്രായേൽ ആക്രമണത്തിനെതിരെയും ഗസ്സയിലെ ജനങ്ങൾക്ക് നേരെ നടക്കുന്ന അതിക്രമങ്ങൾക്കെതിരെയുമുള്ള ഖത്തറി​െൻറ ശ്രമങ്ങൾ ശ്ലാഘനീയമാണെന്നും നന്ദി അറിയിക്കുന്നുവെന്നും പി.എൽ.ഒ എക്സിക്യൂട്ടിവ് കമ്മിറ്റി സെക്രട്ടറി ജനറൽ ഡോ. സാഇബ് ഇറാകാത്ത് പറഞ്ഞു.

ഫലസ്​തീൻ രാഷ്​ട്രത്തിനും ജനതക്കുമുള്ള ഖത്തറി​െൻറ മേഖല–അന്തർദേശീയതല പിന്തുണക്ക് പ്രശംസയുമായി നേരത്തേ ഹമാസ്​ പൊളിറ്റിക്കൽ ബ്യൂറോ തലവൻ ഇസ്​മാഈൽ ഹനിയ്യ രംഗത്തെത്തിയിരുന്നു.ഖത്തറി​െൻറ പിന്തുണ ഫലസ്​തീൻ ജനത തിരിച്ചറിഞ്ഞിട്ടുണ്ടെന്നും അംഗീകരിക്കുന്നുണ്ടെന്നും കഴിഞ്ഞ കാലയളവിൽ ഫലസ്​തീൻ നേരിട്ട പ്രതിസന്ധികൾക്കിടയിൽ അറബ്, ഇസ്​ലാമിക രാഷ്​ട്ര പദവികളിലിരുന്ന് ഖത്തർ ഫലസ്​തീന് വേണ്ടി നിരന്തരം രംഗത്തുണ്ടായിരുന്നുവെന്നും ഖത്തർ മാധ്യമങ്ങൾക്ക് നൽകിയ അഭിമുഖത്തിൽ ഈയടുത്ത്​ ഹനിയ്യ പറഞ്ഞിരുന്നു. ആഭ്യന്തരരംഗത്തും വൈദേശിക തലത്തിലും ഫലസ്​തീൻ ജനതക്ക് സഹായവും പിന്തുണയും നൽകുന്ന പ്രഥമ രാജ്യം കൂടിയാണ് ഖത്തർ.

ഫലസ്​തീനുവേണ്ടിയുള്ള ഖത്തറി‍െൻറ സാമ്പത്തിക സഹായം അന്ന് മുതൽ ഇപ്പോഴും തുടരുകയാണ്. കഴിഞ്ഞവർഷം മാത്രം 180 ദശലക്ഷം ഡോളർ ഖത്തർ ഫലസ്​തീന് നൽകിക്കഴിഞ്ഞു. ഗസ്സയിൽ തകർക്കപ്പെട്ട 10,000 വീടുകളുടെ പുനർനിർമാണത്തിന് ഈ തുക ഏറെ പ്രയോജനപ്പെട്ടു. ഗസ്സയിലെ എല്ലാ പുനർനിർമാണ പ്രവർത്തനങ്ങൾക്കും ഖത്തറി‍െൻറ നേതൃത്വത്തിലുള്ള ഗസ്സ പുനർനിർമാണ സമിതിയാണ് മേൽനോട്ടം വഹിക്കുന്നത്.ഖത്തറിനെതിരായ അന്യായമായ ഉപരോധം മേഖലയുടെ താൽപര്യം മുൻനിർത്തി അടിയന്തരമായി പിൻവലിക്കണമെന്നാണ്​ഫലസ്​ത്വീൻ നിലപാട്​.