റമദാൻ: അമിത വില ഇൗടാക്കിയാൽ കർശന നടപടി

മനാമ: ഉപഭോക്​താക്കളിൽ നിന്ന്​ അമിത വില ഇൗടാക്കുന്ന സ്​ഥാപനങ്ങൾക്കെതിരെ കർശന നടപടി സ്വീകരിക്കുമെന്ന്​ അധികൃതർ വ്യക്​തമാക്കി. റമദാനിൽ ഇൗ തരത്തിലുള്ള യാതൊരു നീക്കവും നടക്കുന്നില്ലെന്ന കാര്യം ഉറപ്പാക്കും. റമദാൻ വേളയിൽ വിപണിയിലെ മുന്നൊരുക്കങ്ങൾ വിലയിരുത്താൻ ചേർന്ന യോഗത്തിലാണ്​ ഇക്കാര്യം അധികൃതർ വ്യക്​തമാക്കിയത്​. വ്യാപാര,വ്യവസായ, ടൂറിസം മന്ത്രാലയം ആഭ്യന്തര വ്യാപാര അസി.അണ്ടർ സെക്രട്ടറി ഹമീദ്​ റഹ്​മയും വ്യാപാരികളും സംയുക്​തമായാണ്​ യോഗം ചേർന്നത്​.

വിപണിയിലെ വില സ്​ഥിരത ഉറപ്പാക്കുമെന്നും പ്രമുഖ വ്യാപാരികൾ ഭക്ഷണസാധനങ്ങളുടെ ലഭ്യത ഉറപ്പാക്കാനുള്ള നടപടികൾ സ്വീകരിച്ചിട്ടു​െണ്ടന്നും മന്ത്രാലയം പ്രസ്​താവനയിൽ പറഞ്ഞു. വിപണിയിലുണ്ടാകുന്ന നിയമലംഘനങ്ങളെ കർശനമായി തടയും. പരസ്യം നൽകിയതിനേക്കാൾ കൂടുതൽ തുക ഉൽപ്പന്നങ്ങൾക്ക്​ ഇൗടാക്കിയ കേസിൽ രണ്ട്​ സൂപ്പർമാർക്കറ്റ്​ ചെയിനുകൾക്കെതിരെ ക്രിമിനൽ നിയമപ്രകാരം നടപടിയെടുത്തതായും അധികൃതർ അറിയിച്ചു.

കഴിഞ്ഞ മാസം നടന്ന മറ്റൊരുയോഗത്തിൽ റമദാൻ വേളയിൽ യാതൊരു കാരണവശാലും സാധനങ്ങൾക്ക്​ വില കൂട്ടില്ലെന്ന്​ രാജ്യത്തെ 96 ചില്ലറ വ്യാപാരികൾ അറിയിച്ചിരുന്നു. ഇതിനായി അവർ കരാർ ഒപ്പിടുകയും ചെയ്​തു. ബഹ്​റൈൻ ചേമ്പർ ​ഒാഫ്​ കൊമേഴ്​സ്​ ആൻറ്​ ഇൻഡസ്​ട്രിയുടെ ഫുഡ്​ ആൻറ്​ അഗ്രികൾചർ കമ്മിറ്റി വാർഷിക യോഗത്തിലാണ്​ കരാർ ഒപ്പിട്ടത്​.