മയക്കുമരുന്നിനെതിരായ പ്രവർത്തനം ശക്​തിപ്പെടുത്താൻ പിന്തുണ

മനാമ: മയക്കുമരുന്നിന്‍റെ പിടുത്തത്തിൽനിന്ന് രക്ഷപ്പെടുത്തുന്നതിനുള്ള ശ്രമം ശക്​തമാക്കേണ്ടതുണ്ടെന്ന്​ ഇസ്​ലാമിക കാര്യ അണ്ടർ സെക്രട്ടറി ജസ്റ്റിസ്​ ഈസ ബിൻ സാമി അൽ മന്നാഇ വ്യക്​തമാക്കി. ലഹരി വിമുക്​തി അസോസിയേഷൻ സന്ദ​ർശനത്തിനെത്തിയതായിരുന്നു അദ്ദേഹം. ലഹരി വിമുക്​തി അസോസിയേഷൻ പ്രസിഡന്‍റ്​ ആദിൽ ബിൻ റാശിദ്​ ബൂസൈബയുടെ നേതൃത്വത്തിൽ അദ്ദേഹത്തെ സ്വീകരിക്കുകയും അസോസിയേഷന്‍ പ്രവർത്തനങ്ങൾ വിശദീകരിക്കുകയും ചെയ്​തു.

കഴിഞ്ഞകാല പ്രവർത്തനങ്ങളിലൂടെ നിരവധി പേരെ ലഹരിയുടെ പിടുത്തത്തിൽനിന്ന് മോചിപ്പിക്കാൻ കഴിഞ്ഞതായി ബൂസൈബ വ്യക്​തമാക്കി. 2018ൽ പ്രവർത്തമാരംഭിച്ച അസോസിയേഷന്​ കീഴിൽ ലഹരി വിമുക്​തി നേടിയവർക്ക്​ വിവിധ ജോലികൾ ലഭിക്കുന്നതിനുളള പരിശീലനങ്ങളും നൽകുന്നുണ്ട്​.

സകാത്​ ഫണ്ടിന്‍റെ സഹായത്തോടെ ആരംഭിച്ച പുതിയ വിദ്യാഭ്യാസ ശിൽപശാലയും അണ്ടർ സെക്രട്ടറി ഉദ്​ഘാടനം ചെയ്​തു. ലഹരിയിൽ നിന്നും വിമുക്​തി പ്രാപിച്ചവർക്ക്​ സ്വയം തൊഴിൽ കണ്ടെത്തുന്നതിനാവശ്യമായ പരിശീലന പദ്ധതിക്ക്​ ഫണ്ട്​ നൽകുമെന്ന്​ അണ്ടർ സെക്രട്ടറി ഉറപ്പു നൽകി. അടുത്തകാലത്ത് 42പേരാണ്​ അസോസിയേഷൻ ​പ്രവർത്തനത്തിലൂടെ ലഹരി വിമുക്​തി നേടിയത്​.