വില്യാപ്പള്ളിക്കാർ ആഗ്രഹിക്കുന്നത്​ മാറ്റം

കഴിഞ്ഞ 45 വർഷമായി തുടരുന്ന ഇടതുപക്ഷ സമിതി വില്യാപ്പള്ളിക്ക് സമ്മാനിച്ചത് വികസനം മുരടിച്ച പഞ്ചായത്ത് എന്ന ബഹുമതിയാണ്. തൊട്ടടുത്തുള്ള എ ഗ്രേഡ്‌ പഞ്ചായത്തുകളുമായി താരതമ്യം ചെയ്യുമ്പോൾ വികസനത്തി​​​െൻറയും പുരോഗതിയുടെയും കാര്യത്തിൽ എത്രയോ പിറകിലാണ് വില്യാപ്പള്ളി പഞ്ചായത്ത്.

നിരവധി കായികതാരങ്ങളെ സംഭാവന ചെയ്​ത വില്യാപ്പള്ളിക്ക് നല്ലൊരു കളിസ്ഥലം എന്നത് സ്വപ്​നമാണ്. വർഷങ്ങൾക്ക്​ മുമ്പ് നിർമിച്ച മിനി സ്​റ്റേഡിയം പൂർണതയിൽ എത്താതെ അതേപടി നിൽക്കുന്നു.തൊട്ടടുത്തുള്ള പഞ്ചായത്തിൽ ഇൻഡോർ സ്​റ്റേഡിയം വരെ വന്നുകഴിഞ്ഞു. വിവിധ പ്രദേശത്തുള്ളവർ ആശ്രയിച്ചിരുന്ന പേരുകേട്ട വില്യാപ്പള്ളി അങ്ങാടി ഇന്ന് വളരെ പിന്നിലായി നിൽക്കുന്നത് നേർക്കാഴ്​ചയാണ്.

45 വർഷങ്ങൾക്കു​ മുമ്പ് മുസ്​ലിം ലീഗ് നേതാവ് കെ.കെ. അബ്​ദുല്ല ഹാജി നിർമിച്ച പഞ്ചായത്ത് ഓഫിസ് കെട്ടിടത്തിൽതന്നെയാണ് ഇന്നും ഒരു മാറ്റവുമില്ലാതെ പ്രവർത്തിക്കുന്നത്.കേരള സർക്കാറിെൻറ ശുചിത്വ അവാർഡ് സ്വീകരിച്ച പഞ്ചായത്താണ് വില്യാപ്പള്ളി എന്നത് കൗതുകകരമാണ്. അങ്ങാടിയിൽ സ്ഥിതിചെയ്യുന്ന ഷോപ്പിങ് കോംപ്ലക്​സ് ഓഡിറ്റോറിയത്തിൽ നിക്ഷേപിച്ച പ്ലാസ്​റ്റിക്​ മാലിന്യവും മത്സ്യ മാർക്കറ്റ്‌ പൊളിഞ്ഞുവീണതിനെത്തുടർന്ന്​ ഓട്ടോ സ്​റ്റാൻഡിൽ നടത്തുന്ന മത്സ്യവിൽപനയും അവാർഡ് നൽകുന്ന സമിതിയുടെ കണ്ണിൽപ്പെടാതെ മറച്ചുവെച്ചതിന് ഭരണസമിതിക്ക് മറ്റൊരു അവാർഡ് നൽകണമെന്നാണ് നാട്ടുകാർ അടക്കം പറയുന്നത്.

ഇടവഴികൾ ടാർ ചെയ്​ത്​, തെരുവുവിളക്കുകൾ പ്രകാശിക്കുന്നത് കാണുക എന്നത് വില്യാപ്പള്ളിക്കാരുടെ സ്വപ്​നമാണ്. കൂരിരുട്ടിൽ തപ്പിത്തടയാനാണ് വില്യാപ്പള്ളിക്കാരുടെ വിധിയെന്നു തോന്നുന്നു. അത് മാറ്റിയെഴുതണം. പൊട്ടിപ്പൊളിഞ്ഞ റോഡുകൾ, പ്രകാശിക്കാത്ത തെരുവുവിളക്കുകൾ, കുടിവെള്ള പ്രശ്​നം എന്നിവക്ക് പരിഹാരം അനിവാര്യമാണ്​.

പഞ്ചായത്ത് ഭരണ സമിതിയുടെ തെറ്റായ ഭരണം അവസാനിപ്പിക്കാൻ ഈ വർഷം വില്യാപ്പള്ളിയിലെ വോട്ടർമാർ തീരുമാനിച്ചു. കോവിഡ് ഭീതിയിലായിരുന്ന പ്രവാസികൾ നാടണയാൻ മുന്നോട്ട് വന്നപ്പോൾ പല തടസ്സങ്ങൾ സൃഷ്​ടിച്ച ഇടതുപക്ഷത്തി​െൻറ സമീപനത്തിനെതിരെ പ്രവാസികൾക്ക് പ്രതികരിക്കാൻ കിട്ടിയ ആദ്യത്തെ അവസരമായി പഞ്ചായത്ത് തെരഞ്ഞെടുപ്പിനെ കാണും.

ഇത് പ്രവാസികൾക്കു വേണ്ടി ശബ്​ദിച്ച ഐക്യജനാധിപത്യ മുന്നണിക്ക് വോട്ടായി മാറും. മാറ്റത്തിനുള്ള തരംഗം പഞ്ചായത്തി​െൻറ എല്ലാ ഭാഗങ്ങളിലും കാണാം.