ഷിഫയില്‍ ലോകരോഗി സുരക്ഷദിനം ആചരിച്ചു

മനാമ: 'സുരക്ഷിതമായ മാതൃ-നവജാത ശിശുസംരക്ഷണം' എന്ന പ്രമേയത്തില്‍ ഷിഫ അല്‍ ജസീറ മെഡിക്കല്‍ സെൻറര്‍ ലോകരോഗി സുരക്ഷദിനം ആചരിച്ചു. സുരക്ഷിതവും ആദരണീയവുമായ പ്രസവം ഉറപ്പുവരുത്താന്‍ ഇപ്പോള്‍ പ്രവര്‍ത്തിക്കുക എന്നതാണ് ഈ വര്‍ഷം ലോകാരോഗ്യ സംഘടന മുന്നോട്ടുവെക്കുന്ന മുദ്രാവാക്യം. പ്രസവസമയത്ത് മരുന്നുകളുടെയും മെഡിക്കല്‍ ഉപകരണങ്ങളുടെയും സുരക്ഷിതമായ ഉപയോഗം ഉറപ്പുവരുത്തുകയാണ്​ ലക്ഷ്യമിടുന്നത്​.

കോവിഡ് മുന്‍കരുതലുകള്‍ പാലിച്ച് ഷിഫയില്‍ നടന്ന പരിപാടിയില്‍ മെഡിക്കല്‍ ഡയറക്​ടര്‍ ഡോ. സല്‍മാന്‍ ഗരീബ് അധ്യക്ഷതവഹിച്ചു.

രോഗികളുടെ സുരക്ഷയാണ് ആരോഗ്യ സേവനത്തി​െൻറ അടിസ്ഥാനശിലയെന്ന് അദ്ദേഹം പറഞ്ഞു. ലോകം കോവിഡ് മഹാമാരി നേരിടുന്ന പാശ്ചാത്തലത്തിൽ ഇത്തവണത്തെ രോഗിസുരക്ഷ ദിനാചരണത്തിന്​ വലിയ പ്രസക്തിയുണ്ടെന്നും അദ്ദേഹം പറഞ്ഞു. അമ്മയുടെയും നവജാതശിശുവി​െൻറയും സുരക്ഷയെക്കുറിച്ച ആഗോള അവബോധം ഉയര്‍ത്തുകയും സുരക്ഷിതമായ മാതൃ നവജാതശിശു പരിചരണം ഉറപ്പാക്കുകയുമാണ് ഈ വര്‍ഷം ദിനാചരണം ലക്ഷ്യമിടുന്നതെന്നും അദ്ദേഹം പറഞ്ഞു.

ഷിഫ സീനിയര്‍ സ്‌പെഷലിസ്​റ്റ്​ പീഡിയാട്രീഷ്യന്‍ ഡോ. കുഞ്ഞിമൂസ സ്വാഗതം പറഞ്ഞു. സ്‌പെഷലിസ്​റ്റ്​ ഗൈനക്കോളജിസ്​റ്റ്​ ഡോ. അലീമ, സ്‌പെഷലിസ്​റ്റ്​ പീഡിയാട്രീഷ്യന്‍ ഡോ. സമീര്‍ ഉല്ലാസ് എന്നിവരും പങ്കെടുത്തു.

ദിനാചരണത്തി​െൻറ ഭാഗമായി കേക്ക് മുറിക്കുകയും പങ്കെടുത്ത അമ്മമാര്‍ക്കും കുഞ്ഞുങ്ങള്‍ക്കും സമ്മാനങ്ങള്‍ നല്‍കുകയും ചെയ്​തു. ക്വാളിറ്റി ആൻഡ്​ പേഷ്യൻറ്​ സേഫ്റ്റി സ്‌പെഷലിസ്​റ്റ്​ ആന്‍സി അച്ചന്‍കുഞ്ഞ് നന്ദി പറഞ്ഞു. ഷാസിയ സര്‍ഫറാസ് ഖാന്‍ അവതാരകയായി.