സകാത്ത്​ ഫണ്ട്: കഴിഞ്ഞ വർഷം ശേഖരിച്ചത്​ നാലു​ ദശലക്ഷം ദീനാർ

മനാമ: നീതിന്യായ, ഇസ്​ലാമിക കാര്യ, ഔഖാഫ്​ മന്ത്രാലയത്തിനു കീഴിലുള്ള സകാത്, സദഖ ഫണ്ടിന്‍റെ പ്രവർത്തനം പോയവർഷം കൂടുതൽ സജീവമായെന്ന്​ ബന്ധപ്പെട്ടവർ പറഞ്ഞു.കോവിഡുമായി ബന്ധപ്പെട്ട്​ കൂടുതൽ സഹായ പ്രവർത്തനങ്ങൾ നടത്താൻ സാധിച്ചതായി സകാത്ത്​ ഫണ്ട്​ ചെയർമാൻ ശൈഖ്​ സലാഹ്​ ഹൈദർ വ്യക്​തമാക്കി. നാല്​ ദശലക്ഷം ദീനാറാണ്​ 2021ൽ ശേഖരിച്ചത്​. നിശ്ചിത വ്യവസ്​ഥ പ്രകാരം 682 കുടുംബങ്ങൾക്കായി 75,000ത്തിലധികം ദീനാർ വിതരണം ചെയ്​തു. പാവപ്പെട്ട കുടുംബങ്ങൾക്ക്​ സാമ്പത്തിക സഹായമടക്കം വിതരണം ചെയ്​തിരുന്നു. 36 കുടുംബങ്ങൾക്ക്​ 10,000 ദീനാറിന്‍റെ ഇലക്​ട്രിക്​ ഉപകരണങ്ങളും 25 കുടുംബങ്ങൾക്ക്​ വർഷം മുഴുവൻ മാസാന്ത സഹായമെന്ന നിലക്ക്​ 15,000 ദീനാറും ​സ്​കൂളിലേക്കാവശ്യമായ സാമഗ്രികൾ വാങ്ങാനുള്ള പദ്ധതി പ്രകാരം 600 കുടുംബങ്ങൾക്ക് 9500 ദീനാറും 575 കുടുംബങ്ങൾക്ക്​ റമദാൻ കിറ്റുകൾക്കായി 15,000 ദീനാറും വീട്ടിലേക്കുള്ള ഭക്ഷണ സാധനങ്ങൾ വാങ്ങുന്നതിനായി 35 കുടുംബങ്ങൾക്ക്​ പർച്ചേസ്​ കൂപ്പണുകളും രോഗബാധിതരായ 15 കുട്ടികളുടെ ചികിത്സക്കായി 10,000 ദീനാറും നൽകുകയുണ്ടായി. കുട്ടികളുടെ ഓൺലൈൻ പഠനം ഉറപ്പാക്കുന്നതിനായി 31 കുട്ടികൾക്ക്​ ടാബ്​ വാങ്ങി നൽകുന്നതിന്​ 5,000 ദീനാറും വിന്‍റർ കോട്ടുകൾ വാങ്ങുന്നതിനായി 1950 കുട്ടികൾക്ക്​ 15,000 ദീനാറും ചെലവഴിക്കുകയുണ്ടായി. പ്രയാസങ്ങളിൽ വലഞ്ഞ 938 കുടുംബങ്ങൾക്ക് മൊത്തം ​ 3.9 ദശലക്ഷം ദീനാറിന്‍റെ സഹായങ്ങളാണ്​ എത്തിച്ചത്​.

സകാത്​ ഫണ്ടിലേക്ക്​ BH78BIBB00100000001648 എന്ന അക്കൗണ്ട്​ നമ്പറിൽ പൊതുജനങ്ങൾക്ക്​ സംഭാവന നൽകാവുന്നതാണെന്നും അദ്ദേഹം കൂട്ടിച്ചേർത്തു.