ബാൽക്കണിയിൽ വളർത്താം തായ്‌ലൻഡ് മാവ്

ചെടികൾ വളർത്തുന്നത്​ പോലെ ഫല വൃക്ഷങ്ങളും ബാൽക്കണയിൽ വലിയ ഡ്രമ്മിൽ വെച്ചു പിടിപ്പിക്കാം. തായലൻഡ് മാവ് ഈ ഗണത്തിൽപെടുത്താവുന്ന മരമാണ്​. എല്ലാ സീസണിലും കായ്ഫലം തരും. നല്ല സൂര്യപ്രകാശം ഉള്ള സ്ഥലത്തു വേണം വെക്കാൻ.

ഒരുപാട് പൊക്കം വെക്കാതെ ​വെട്ടിനിർത്താം. മാമ്പഴത്തിന്​ രുചി മാത്രമല്ല, നല്ല മണവുമുണ്ട്​. ഓരോ ബാച്ച് ആയാണ്​ പൂക്കുന്നത്. അതു കൊണ്ട് തന്നെ മിക്കവാറും സമയങ്ങളിൽ മാങ്ങ കാണും. മീൻകറിയിലിടാനും അച്ചാർ ഉണ്ടാക്കാനും നല്ലതാണ്. തൊലിക്ക്​ നല്ല കട്ടിയാണ്. ദശ കുറവാണെങ്കിലും പഴുത്താൽ ഇരട്ടി സ്വാദാണ്​. മാവിൽ നിന്ന്​ തന്നെ പഴുത്തു കിട്ടുന്നതാണ് നല്ലത്. മാങ്ങാ കടും മഞ്ഞ നിറത്തിലെത്തും. അതിനു ശേഷം മാത്രം അടർത്തിയെടുക്കുക. പഴുക്കുന്നതിനു മുന്നേ അടർത്തിയെടുതിട്ടു പഴുപ്പിച്ചാൽ അത്ര മധുരം കാണില്ല. പ്ലാന്‍റ്​ നഴ്സറിയിൽ നിന്ന്​ നല്ല ഇനം ബഡ് തൈകൾ കിട്ടും. ചെറുതിലെ കായ്ഫലം തരുന്നതാണ് തായ്‌ലൻഡ് മാവ്. തൈകൾ വാങ്ങിയ ഉടൻ നടരുത്. രണ്ടു ദിവസമെങ്കിലും നമ്മുടെ കാലാവസ്ഥയുമായി പരിചയപ്പെട്ട ശേഷം വേണം നടാൻ. മണ്ണ്​, എല്ലുപൊടി, വേപ്പിൻ പിണ്ണാക്ക്, ചകിരിച്ചോർ, ചാണകപൊടി തുടങ്ങി ഏതു വളമായാലും മതി. എല്ലാം കൂടെ നന്നായി യോജിപ്പിച്ചു വെക്കുക. ഡ്രമ്മിന്​ ഡ്രൈനേജ് സംവിധാനം ഉണ്ടെന്നു ഉറപ്പു വരുത്തുക. ഹോൾ ഇല്ലേൽ ഇട്ടു കൊടുക്കണം. ഡ്രമ്മിന്‍റെ നടുവിൽ ഹോൾ ഇടരുത്​. സൈഡ് ഭാഗത്താണ് ഇടേണ്ടത്. 7-8 ഹോൾ ഇടാം. ഡ്രമ്മിന്‍റെ വലിപ്പം അനുസരിച്ച്​ ആദ്യം കല്ലും കട്ടയും ഉണ്ടെകിൽ ഇട്ടിട്ടു വേണം മണ്ണ് നിറക്കാൻ. മാവിൻ തൈ നട്ട ശേഷം കുറച്ചു കൂടി മണ്ണ് ഇട്ടു കൊടുക്കാം. എന്നും നനച്ചു കൊടുക്കാം. മാവ് കായ്​ച്ചു കഴിഞ്ഞാൽ ആ ഭാഗം കട്ട്​ ചെയ്തു കൊടുക്കാം. എങ്കിലെ വീണ്ടും പൂക്കുകയുള്ളു.