അറുപതിലെ ആധി അധികൃതർ കാണാതെ പോവരുത്

​ 60 വയസ്സ്​​ കഴിഞ്ഞ ഉന്നത വിദ്യാഭ്യാസ യോഗ്യതയില്ലാത്ത വിദേശികളുടെ വിസ പുതുക്കേണ്ട എന്ന നിയമം കുവൈത്തിൽ പ്രാബല്യത്തിൽ വരുമ്പോൾ നിരവധിപേർ ആധിയിലാണ്​. അതിൽ ഭൂരിഭാഗവും 35ഉം 40ഉം അതിൽ കൂടുതലും വർഷം പ്രവാസജീവിതം നയിച്ചവരാണ്​. യുവത്വത്തി​ൻെറ തുടക്കത്തിൽ നാടും വീടും വിട്ട് മരുഭൂമിയിൽ സുഖജീവിതം നഷ്​ടപ്പെടുത്തുമ്പോഴും നാട്ടിലുള്ള ഉറ്റവർ സാമ്പത്തികഭദ്രതയോടെ സമാധാനമായി കഴിയുന്ന ചിത്രങ്ങൾ മനസ്സിലുള്ളതിനാൽ അവ​ൻെറ ആയുസ്സി​ൻെറ ഭൂരിഭാഗവും എരിഞ്ഞുതീർന്നത് അറിയുന്നുണ്ടായിരുന്നില്ല. പ്രവാസം മനസ്സിനേൽപിച്ച പോലെ ശരീരത്തിനും ഏറെ ആഘാതമായി. പലരുടെയും സമ്പാദ്യം രോഗങ്ങളാണ്​.

വീടുവെക്കാനും കുട്ടികളെ വളർത്താനും അവർക്ക് നല്ല വിദ്യാഭ്യാസം നൽകാനും നാട്ടിലെ സാംസ്കാരിക പൊതുപ്രവർത്തനങ്ങൾക്കും ബന്ധുക്കൾക്കും സഹായിച്ചതി​ൻെറ ഫലമായി പലരുടെയും ബാങ്ക് ബാലൻസ് നാട്ടിൽ ചെന്നാൽ രണ്ടു മാസം കഴിഞ്ഞുകൂടാൻ തികയില്ല. കൂടാതെ, ഭവന വായ്പയും മക്കൾക്കായെടുത്ത വിദ്യാഭ്യാസ വായ്പയുമൊക്കെയായി വലിയൊരു സംഖ്യ ബാധ്യതയുമുണ്ട്​. വാർധക്യത്തിൽ എല്ലാം നിർത്തി നാട്ടിലേക്ക് മടങ്ങേണ്ടിവരുമ്പോൾ തൊഴിൽരഹിത​ൻെറ അവസ്ഥയാവും. ജനിച്ച നാട്ടിൽ തിരികെയെത്തുന്ന ഓരോ പ്രവാസിക്കും അന്യഥാബോധവും സാമൂഹികമായ അപരിചതത്വവുമാണ്.

വാർധക്യത്തിൽ വീടണയുന്ന പല പ്രവാസികൾക്കും സ്വന്തം മക്കളുടെ സ്നേഹസമീപനംപോലും ലഭിക്കില്ല. കാരണം, അമ്മയുടെ സ്നേഹവാത്സല്യങ്ങൾ മാത്രം അനുഭവിച്ചറിഞ്ഞ മക്കൾക്ക് അതിന്​ പകരം നിൽക്കാൻ വിഡിയോകോളിലൂടെ കഴിയില്ല. സർക്കാർ ജീവനക്കാരുടെ വിരമിക്കൽ ജീവിതം മരണംവരെ സാമ്പത്തികസുരക്ഷ നിറഞ്ഞതാണ്​. നാടിനുകൂടി ഗുണമുണ്ടായ രീതിയിൽ അന്യനാട്ടിൽ ജീവിതം ഹോമിച്ച പ്രവാസിയുടെ പ്രയാസങ്ങൾ സർക്കാർ കണ്ടില്ലെന്നു​ നടിക്കരുത്. എല്ലാവരെയും സഹായിച്ചു മാത്രം ശീലമുള്ള പ്രവാസിക്ക് മരുന്ന് വാങ്ങാനോ വട്ടച്ചെലവിനോ മക്കളു​ടെയോ മറ്റോ മുന്നിൽ കൈനീ​േട്ടണ്ടിവരുന്നു. വാർധക്യത്തിലേക്ക് കടക്കുന്ന അവരെ ഏറ്റെടുക്കാനുള്ള വിഭവസമൃദ്ധി നമുക്കുണ്ട്. വേണ്ടത് അതിനുള്ള ഇച്ഛാശക്തിയും വിവേകവുമാണ്. muhammad nasar മുഹമ്മദ് നാസർ കൊടുങ്ങല്ലൂർ