കുവൈത്ത്​ വിമാനത്താവളം തുറന്ന്​ 100 ദിവസം പിന്നിട്ടു

കുവൈത്ത്​ സിറ്റി: കോവിഡ്​ പ്രതിസന്ധിയിൽ നിർത്തിയ ശേഷം കുവൈത്ത്​ അന്താരാഷ്​ട്ര വിമാനത്താവളത്തിൽനിന്ന്​ കമോഴ്​സ്യൽ വിമാന സർവിസ്​ ആരംഭിച്ച്​ 100 ദിവസം പിന്നിട്ടു. ആഗസ്​റ്റ്​ ഒന്നിനാണ്​ കുവൈത്ത്​ വിമാനത്താവളത്തിൽനിന്ന്​ ​നിയന്ത്രണങ്ങളോടെ കമേഴ്​സ്യൽ വിമാന സർവിസ്​ ആ​രംഭിച്ചത്​.

ഇന്ത്യ ഉൾപ്പെടെ 34 രാജ്യങ്ങളിൽനിന്ന്​ ഇപ്പോഴും നേരിട്ട്​ കുവൈത്തിലേക്ക്​ വരാൻ അനുമതിയില്ല. 100 ദിവസത്തിനിടെ കുവൈത്തിലേക്ക്​ 1,92,000 പേർ വിമാന മാർഗം വന്നു. ഇതിൽ ഭൂരിഭാഗവും നേരിട്ട്​ കുവൈത്തിലേക്ക്​ വരാൻ വിലക്കുള്ള രാജ്യങ്ങളിൽനിന്നുള്ള പ്രവാസികളാണ്​. ഇന്ത്യ, ഇൗജിപ്​ത്​, ഫിലിപ്പീൻസ്​, ബംഗ്ലാദേശ്​, ശ്രീലങ്ക തുടങ്ങി കുവൈത്തിലെ വലിയ വിദേശി സമൂഹങ്ങ​ളൊക്കെയും വിലക്കുള്ള രാജ്യങ്ങളുടെ പട്ടികയിലാണുള്ളത്​.

ദുബൈ, തുർക്കിയിലെ ഇസ്​തംബൂൾ വിമാനത്താവളങ്ങൾ ഇടത്താവളമാക്കി ആ രാജ്യത്ത്​ രണ്ടാഴ്​ച ക്വാറൻറീനിൽ ഇരുന്നാണ്​ പ്രവാസികൾ വരുന്നത്​. അവധിക്ക്​ നാട്ടിൽ പോയ പ്രവാസികൾ ജോലി നഷ്​ടപ്പെടാതിരി​ക്കാൻ ഏറെ സാഹസപ്പെട്ടാണ്​ കുവൈത്തിലെത്തുന്നത്​. തിരിച്ചെത്താൻ കഴിയാതെ വിസ കാലാവധി കഴിഞ്ഞ്​ നിരവധി പേരുടെ അവസരം നഷ്​ടമായിട്ടുണ്ട്​.