ഇന്ത്യയിൽനിന്ന്​ വിമാനങ്ങൾക്ക്​ മന്ത്രിസഭയുടെ അനുമതി

കുവൈത്ത്​ സിറ്റി: ഇന്ത്യ, നേപ്പാൾ, ഇൗജിപ്​ത്​, പാകിസ്ഥാൻ, ശ്രീലങ്ക, ബംഗ്ലാദേശ്​ എന്നീ രാജ്യങ്ങളിൽനിന്ന്​ വിമാന സർവീസിന്​ കുവൈത്ത്​ മന്ത്രിസഭ അനുമതി നൽകി. പ്രധാനമന്ത്രി ശൈഖ്​ സബാഹ്​ ഖാലിദ്​ അൽ ഹമദ്​ അസ്സബാഹി​െൻറ അധ്യക്ഷതയിൽ ബുധനാഴ്​ച രാത്രി ചേർന്ന മന്ത്രിസഭ ​യോഗമാണ്​ തീരുമാനമെടുത്തത്​.കൊറോണ എമർജൻസി കമ്മിറ്റി നിശ്ചയിക്കുന്ന വ്യവസ്ഥകൾക്ക്​ അനുസൃതമായാണ്​ അനുമതിയെന്ന്​ മന്ത്രിസഭ വ്യക്​തമാക്കി.

കുവൈത്ത്​ അംഗീകരിച്ച രണ്ട്​ ഡോസ്​ വാക്​സിൻ സ്വീകരിച്ചിരിക്കണമെന്നും യാത്രക്ക്​ 72 മണിക്കൂർ മുമ്പ്​ സമയപരിധിയിൽ നടത്തിയ പി.സി.ആർ പരിശോധന അനുസരിച്ച്​ കോവിഡ്​ മുക്​തനായിരിക്കണമെന്നുമാണ്​ പ്രധാന നിബന്ധന. ഫൈസർ, മോഡേണ, ആസ്​ട്രസെനക, ജോൺസൻ ആൻഡ്​ ജോൺസൻ എന്നീ വാക്​സിനുകളാണ്​ കുവൈത്ത്​ അംഗീകരിച്ചിട്ടുള്ളത്​. ജോൺസൻ ആൻഡ്​ ജോൺസൻ വാക്​സിൻ ഒറ്റ ഡോസ്​ ആണ്​. ഇന്ത്യയിൽ വിതരണം ചെയ്യുന്ന കോവിഷീൽഡ്​ വാക്​സിൻ ആസ്​ട്രസെനകയാണ്​. ദീർഘകാലമായി നാട്ടിൽ കുടുങ്ങിയ പ്രവാസികൾക്ക്​ കുവൈത്തിലേക്ക്​ തിരിച്ചുവരാൻ മന്ത്രിസഭയുടെ പ്രഖ്യാപനത്തോടെ കളമൊരുങ്ങി.