കനത്ത പരിശോധന: കർഫ്യൂ അറിയാതെയും നിരവധി പേർ

കുവൈത്ത്​ സിറ്റി: കുവൈത്തിൽ നിരോധനാജ്​ഞ ആരംഭിച്ച ഞായറാഴ്​ച വൈകുന്നേരം അഞ്ചുമണി മുതൽ തന്നെ കർശന പരിശോധന നടന്നു. പുറത്തുപോയി തിരികെയെത്താൻ കഴിയാതെ വഴിയിലായ വാഹനങ്ങളും കർഫ്യൂ അറിയാതെ നിരത്തിലിറങ്ങിയവരെയും പൊലീസ്​ തടഞ്ഞു. ആദ്യ ദിവസമായതിനാൽ താക്കീത്​ നൽകി വിട്ടയച്ചുവെന്നാണ്​ അനുഭവസ്ഥർ പങ്കുവെച്ച വിവരം. പൊലീസും നാഷനൽ ഗാർഡും ഉൾപ്പെടെ നിരീക്ഷണത്തിന്​ നിരത്തിലുണ്ട്​.

കർഫ്യൂ നിയമം ലംഘിക്കുന്നവർക്ക്​ മൂന്നുവർഷം വരെ തടവോ അല്ലെങ്കിൽ 10000 ദീനാർ പിഴയോ ശിക്ഷ നൽകുമെന്നാണ്​ ആഭ്യന്തര മന്ത്രി അനസ്​ അൽ സാലിഹ്​ അറിയിച്ചിട്ടുണ്ട്​. സിവിൽ ഡിഫൻസ്​ അതോറിറ്റിയെയാണ്​ കർഫ്യൂ നടപ്പാക്കുന്നതിന്​ ചുമതലപ്പെടുത്തിയിട്ടുള്ളത്​. ​പൊലീസും സേനയും സംയുക്​തമായാണ്​ നിരോധനാജ്​ഞ നടപ്പാക്കാൻ രംഗത്തിറങ്ങിയിട്ടുള്ളത്​. നിരത്തുകൾ ഏറെക്കുറേ വിജനമാണ്​. അടിയന്തര സേവനങ്ങളിൽ ജോലി എടുക്കുന്നവർക്ക്​ പ്രത്യേക തിരിച്ചറിയൽ കാർഡ്​ നൽകുന്നുണ്ട്​. ഇതുപയോഗിച്ച്​ പോവുന്ന ഒറ്റപ്പെട്ട വാഹനങ്ങൾ മാത്രമാണ്​ പൊലീസ്​ വാഹനങ്ങളെ കൂടാതെ നിരത്തിലുള്ളത്​.