മനഃപാഠങ്ങള്‍ക്കപ്പുറ​ത്തെ അറിവുകളുമായി ഗ്രെയിന്‍എഡ് ഓണ്‍ലൈന്‍ ക്ലാസുകള്‍

കുവൈത്ത്​ സിറ്റി: പ്രോഗ്രസിവ് പ്രഫഷനല്‍ ഫോറവും ബാലവേദിയും ചേർന്ന്​ കുവൈത്തിലെ വിദ്യാർഥികള്‍ക്കായി ഗ്രെയിന്‍എഡ് ഓണ്‍ലൈന്‍ ക്ലാസുകള്‍ സംഘടിപ്പിക്കുന്നു. മനഃപാഠങ്ങള്‍ക്കപ്പുറത്ത്, പ്രായോഗിക അറിവുകളിലൂടെയും നിത്യജീവിത ഉദാഹരണങ്ങളിലൂടെയും വിജ്ഞാനത്തി‍െൻറ അടിസ്ഥാന ശിലകള്‍ കുഞ്ഞുമനസ്സുകളിലുറപ്പിക്കുക എന്നതാണ് ലക്ഷ്യം. ഗ്രെയിന്‍എഡ്, തൃശൂര്‍ ഗവ. എൻജിനീയറിങ്​ കോളജില്‍നിന്ന് പഠിച്ചിറങ്ങിയ ഒരുകൂട്ടം എൻജിനീയര്‍മാരുടെ സാമൂഹിക പ്രതിബദ്ധതയില്‍നിന്ന് ഉരുത്തിരിഞ്ഞ, ലാഭേച്ഛയില്ലാതെ പ്രവര്‍ത്തിക്കുന്ന വിദ്യാഭ്യാസ സംരംഭമാണ്.

പ്രോഗ്രസിവ് പ്രഫഷനല്‍ ഫോറവും ബാലവേദിയും ചേർന്ന്​ അമ്പതോളം ഗ്രെയിന്‍എഡ് ഓണ്‍ലൈന്‍ ക്ലാസുകള്‍ ഇതുവരെ സംഘടിപ്പിച്ചു. ഒമ്പതു മുതല്‍ 12ാം ക്ലാസു വരെ പഠിക്കുന്ന 150ഒാളം വിദ്യാർഥികളും വിജ്ഞാന കുതുകികളും കഴിഞ്ഞ മേയ് മാസം മുതല്‍ എല്ലാ ശനിയാഴ്ചയും സംഘടിപ്പിക്കുന്ന ക്ലാസുകളുടെ ഭാഗമായി 'ശാസ്ത്രം- ഇന്നലെ, ഇന്ന്, നാളെ' - സതീഷ് കുമാര്‍, 'മനുഷ്യ മസ്തിഷ്കം -ഒരു പ്രഹേളിക' - ഡോ. രാജീവ് മോഹന്‍രാജ്, 'നിങ്ങളും സമൂഹവും നിയമവും' - അഡ്വ. രാജേഷ് മുട്ടത്ത് 'വിജയത്തിലേക്കുള്ള ഡിസൈന്‍ വിദ്യകൾ' - നിധി ജെയിന്‍ സേത്ത്, 'ആഴത്തില്‍ ചിന്തിക്കുക, വ്യത്യസ്​തമായും'- ശ്രീകാന്ത് മണി, 'ജീവ​െൻറ ചക്രം' - മധു ഷണ്‍മുഖന്‍, 'വൈദ്യുതിയുടെ ലോകം' - സിബില്ല സജീത്ത്, 'എൻജിനീയറിങ്ങി​െൻറ നാല് സ്തംഭങ്ങൾ' - ഡോ. നജീബ് കുഴിയില്‍, 'പരിണാമം -നമ്മുടെ അസ്​തിത്വമെന്ത്?' - ഡോ. ജിമ്മി മാത്യു, 'ആഗോളവത്കരണം' - പ്രദീപന്‍ കുഞ്ഞിരാമന്‍ എന്നീ കോഴ്സുകളാണ് ഇതുവരെ സംഘടിപ്പിച്ചത്. 20ൽപരം വിഷയങ്ങളിലെ തുടര്‍ ക്ലാസുകളും ഒാൺലൈനായി നടത്തും. കൂടുതല്‍ വിവരങ്ങള്‍ക്കായി ppfk@ppfkuwait.org എന്ന ഇ^മെയിലില്‍ ബന്ധപ്പെടുക. ഗ്രെയിന്‍എഡ് ക്ലാസുകളെ പറ്റിയുള്ള കൂടുതല്‍ വിവരങ്ങള്‍ www.grain-ed.comല്‍ ലഭ്യമാണ്​.