നിയന്ത്രണം നീക്കലിന്​ പ്രശ്​നം തീർന്നെന്ന്​ അർഥമില്ല –ആരോഗ്യ മന്ത്രി

കുവൈത്ത്​ സിറ്റി: കർഫ്യൂ സമയം കുറച്ചും ഒാഫിസുകളുടെ പ്രവർത്തനശേഷി വർധിപ്പിക്കാൻ അനുമതി നൽകിയും കോവിഡ്​ പ്രതിരോധത്തിന്​ ഏർപ്പെടുത്തിയ നിയന്ത്രണങ്ങൾ നീക്കുന്നതിന്​​ രാജ്യത്ത്​ വൈറസ്​ പ്രശ്​നം തീർന്നുവെന്ന്​ അർഥമില്ലെന്ന്​ ​ആരോഗ്യ മന്ത്രി ഡോ. ബാസിൽ അസ്സബാഹ്​ പറഞ്ഞു. 
ഒരു വാക്​സിനും ഇതുവരെ ഒൗദ്യോഗികമായി അംഗീകരിക്കപ്പെട്ടിട്ടില്ല. കൃത്യമായ മരുന്ന്​ കണ്ടുപിടിക്കുന്നതു​ വരെ ആരോഗ്യ സുരക്ഷ മാർഗനിർദേശങ്ങൾ അനുസരിച്ച്​ ജീവിക്കുകയല്ലാതെ വഴിയില്ല. അത്യാവശ്യത്തിന്​ പുറത്തിറങ്ങുകയും മാസ്​കും കൈയുറയും ധരിക്കുകയും ശുചീകരണവും കൈകഴുകലും ശീലമാക്കുകയും അണുനശീകരണവും സാമൂഹിക അകലം പാലിക്കുകയുമാണ്​ വഴി. 

പ്രായമായവർക്കും കുട്ടികൾക്കും ഗർഭിണികൾക്കും വിട്ടുമാറാത്ത രോഗങ്ങൾ ഉള്ളവർക്കും പ്രത്യേക പരിചരണം നൽകണം. കുവൈത്തികൾക്കിടയിലാണ്​ രാജ്യത്ത്​ ഇപ്പോൾ പുതുതായി കൂടുതൽ വൈറസ്​ ബാധയേൽക്കുന്നത്​. ആകെ കേസുകളുടെ 70 ശതമാനവും സ്വദേശികളിലാണ്​. ആരോഗ്യ മാർഗനിർദേശങ്ങൾ പാലിക്കാത്ത കുടുംബാംഗങ്ങളിൽനിന്നാണ്​ കുടുംബത്തിലെ മുതിർന്ന അംഗങ്ങൾക്ക്​ രോഗബാധ​. ഇത്​ അപകടകരമാണെന്നും അദ്ദേഹം പറഞ്ഞു.