ഇൻഷുറൻസ്​ ആശുപത്രി അടുത്ത വർഷം അവസാനത്തോടെ

കുവൈത്ത്​ സിറ്റി: രാജ്യത്തെ വിദേശികളുടെ ചികിത്സ സര്‍ക്കാര്‍ ആശുപത്രികളില്‍നിന്ന്​ മാറ്റുന്നതി​െൻറ ഭാഗമായി രൂപവത്​കരിച്ച ഇൻഷുറൻസ്​ ആശുപത്രി പൂർണമായി പ്രവർത്തന സജ്ജമാവുക 2021 അവസാനത്തോടെ. ഇൻഷുറൻസ്​ കമ്പനിക്കു കീഴിൽ രാജ്യവ്യാപകമായി 12 പ്രാഥമികാരോഗ്യ കേന്ദ്രങ്ങളും മൂന്നു വലിയ ആശുപത്രികളുമാണ് നിലവിൽവരുക.

അഹമ്മദി, ഫർവാനിയ, ജഹ്റ എന്നിവിടങ്ങളിലാണ് വലിയ​ ആശുപത്രികൾ പ്രവർത്തിക്കുക. മുഴുവൻ പദ്ധതികളും പ്രാവർത്തികമാകുന്നതോടെ സ്വകാര്യമേഖലയിലെ 20 ലക്ഷത്തിലധികംവരുന്ന വിദേശികളും അവരുടെ കുടുംബവും ഇതിെൻറ പ്രയോജകരായി മാറും. പൂർണതോതിൽ പ്രവർത്തനക്ഷമമാവുന്നതോടെ ഇൻഷുറൻസ്​ ഫീസ്​ നിലവിലെ 50 ദീനാറിൽനിന്ന് 130 ദീനാറായി ഉയരും. ഹവല്ലിയിലും ഫർവാനിയയിലും ദമാൻ ക്ലിനിക്കുകൾ ആരംഭിച്ചുകഴിഞ്ഞിട്ടുണ്ട്. വിവിധ ഗവര്‍ണറേറ്റുകളിലായി അഞ്ച് പ്രാഥമിക ആരോഗ്യ കേന്ദ്രങ്ങള്‍ വൈകാതെ തുറന്നു പ്രവര്‍ത്തിക്കും.

ദമാന്‍ കമ്പനിയുടെ അഹമ്മദി, ജഹ്റ എന്നിവിടങ്ങളിലെ ആശുപത്രികൾ 2021 സെപ്​റ്റംബറിൽ പൂർത്തിയാക്കുമെന്ന്​ ദമാൻ സി.ഇ.ഒ ഡോ. മുഹമ്മദ് അൽ ഖനൈഇ പറഞ്ഞു. ഫർവാനിയയിലെ ആശുപത്രി നിർമാണം ആരംഭിച്ചിട്ടുണ്ട്​. 130 ദീനാർ ഇൻഷുറൻസ്​ തുക നൽകുന്നുണ്ടെങ്കിലും ഒാരോ സന്ദർശനത്തിനും രണ്ട്​ ദീനാർ ഫയൽ ഒാപണിങ്​ ഫീസ്​ നൽകേണ്ടി വരും.

എല്ലാ ആധുനിക സൗകര്യങ്ങളുമുള്ള ആശപത്രികളും ക്ലിനിക്കുകളും ആണ് തയാറാവുന്നതെന്നും ജീവനക്കാരെ നിയമിക്കുന്നതിൽ ഉൾപ്പെടെ അന്താരാഷ്​ട്ര മാനദണ്ഡവും നിലവാരവും പാലിക്കുമെന്നും അധികൃതർ വ്യക്തമാക്കി. ഇൻഷുറൻസ്​ ആശുപത്രി പ്രവർത്തനമാരംഭിക്കുന്നതോടെ സർക്കാർ ആശുപത്രിയിലെയും ക്ലിനിക്കുകളി​ലെയും തിരക്ക്​ ഗണ്യമായി കുറയും.