ഇനി കാമറയുമായി അൻവർ വരില്ല; സുഹൃദ്​മനസ്സുകളിൽ കണ്ണീരോർമയായി അവൻ മടങ്ങി

കുവൈത്ത്​ സിറ്റി: കുവൈത്തിലെ സംഘടന, സാമൂഹിക പ്രവർത്തന രംഗത്ത്​ സജീവമായവ​ർക്കെല്ലാം സുപരിചിതനായ അൻവർ സാദത്ത്​ അൻസിന്‍റെ ​പൊടുന്നനെയുള്ള വിയോഗം കുവൈത്തിലെ മലയാളി സമൂഹത്തെ ഏറെ നൊമ്പരപ്പെട​ുത്തുന്നതായിരുന്നു. കുവൈത്തിലെ പ്രവാസി സംഘടന പരിപാടികളിലെ സ്ഥിരസാന്നിധ്യമായ ഫോ​േട്ടാഗ്രാഫർ എന്ന നിലയിൽ മിക്കവർക്കും സുപരിചിതനായിരുന്ന അൻവർ സാദത്ത്​ തിങ്കളാഴ്​ചയാണ്​ അപ്രതീക്ഷിതമായി മരണത്തിനു കീഴടങ്ങിയത്​.

ഏതാനും ദിവസമായി അമീരി ആശുപത്രിയിൽ ചികിത്സയിലായിരുന്നു അദ്ദേഹം. ഇൗ ഘട്ടങ്ങളിലെല്ലാം പ്രിയ സുഹൃത്തിനെ ആരോഗ്യത്തോടെ തിരിച്ചുലഭിക്കാനുള്ള പ്രാർഥനയിലായിരുന്നു പ്രവാസി സമൂഹം. സമൂഹ മാധ്യമങ്ങളിൽ കഴിഞ്ഞ ദിവസങ്ങളിൽ അൻവർ സാദത്തിനായുള്ള പ്രാർഥന ആഹ്വാനങ്ങൾ നിറഞ്ഞുനിന്നിരുന്നു.

ഗുരുതരാവസ്ഥയിലായിരുന്ന അദ്ദേഹത്തി​െൻറ ആരോഗ്യം അൽപം മെച്ചപ്പെട്ടുവെന്ന്​ ഞായറാഴ്​ച വിവരം ലഭിച്ചപ്പോൾ എല്ലാവരും ആശ്വസിച്ചു. എന്നാൽ, തിങ്കളാഴ്​ച വീണ്ടും വഷളായി. ഒടുവിൽ വിധിയുടെ തീർപ്പിന്​ മുന്നിൽ നിസ്സഹായനായി പ്രിയ സുഹൃത്ത്​ മടങ്ങിയതോടെ കുവൈത്ത്​ മലയാളികൾക്കിടയിൽ ആ സങ്കടവാർത്ത കണ്ണീർമഴയായി. അൻവർ ഇനി ജനമനസ്സുകളിൽ പുഞ്ചിരി തൂകുന്ന ഒാർമച്ചിത്രമായി സുഹൃദ്​ മനസ്സുകളിൽ മായാതെ നിൽക്കും.

ഫോ​േട്ടാഗ്രാഫർ എന്ന നിലയിൽ സ്വയം അടയാളപ്പെടുത്തിയ ജീവിതമായിരുന്നു​ അദ്ദേഹത്തി​േൻറത്​. മറ്റു തൊഴിലിനിടയിലും കാമറയെ അത്രമേൽ പ്രണയിക്കീകയായിരുന്നു അൻവർ. ഗൾഫ്​ മാധ്യമത്തിൽ ഉൾപ്പെടെ അദ്ദേഹ​ത്തി​െൻറ നിരവധി മികച്ച ചിത്രങ്ങൾ പ്രസിദ്ധീകരിച്ചിട്ടുണ്ട്​. വിപുലമായ സൗഹൃദ വലയത്തിന്​ ഉടമയായിരുന്ന അദ്ദേഹം സാമൂഹിക, സാംസ്​കാരിക പ്രവർത്തന മേഖലയിലും സജീവമായിരുന്നു. സമൂഹ മാധ്യമങ്ങളിലും സജീവമായി ഇടപെട്ടിരുന്നു. സൗമ്യമായ പെരുമാറ്റവും പുഞ്ചിരിയും ആയിരുന്നു മുഖമുദ്ര. കോഴിക്കോട്​ ബിലാത്തിക്കുളം സ്വദേശിയാണ്​. ഭാര്യ: അൻസില.