ശീശ ക​േഫകൾ നിയന്ത്രണങ്ങളോടെ തുറക്കാൻ അനുമതി

കുവൈത്ത്‌ സിറ്റി: കുവൈത്തില്‍ ശീശ കഫേകള്‍ക്ക്​ നിയന്ത്രണങ്ങളോടെ തുറന്നുപ്രവര്‍ത്തിക്കാന്‍ അനുമതി. തൊഴിലാളികൾ മാസ്​കും കൈയുറയും ധരിക്കണം, ഒറ്റത്തവണ ഉപയോഗിക്കുന്ന പ്ലേറ്റുകളും കപ്പുകളും ഉപയോഗിക്കുക, ശീശ അണുവിമുക്​തമാക്കുക തുടങ്ങിയ നിബന്ധനകൾ പാലിക്കേണ്ടതുണ്ട്​.

കോവിഡ്​ വ്യാപനത്തെ തുടർന്ന്​ 2020 മാർച്ച്​ മുതൽ ശീശ (ഹുക്ക) കഫേകളുടെ പ്രവർത്തനം നിർത്തിവെച്ചിരിക്കുകയായിരുന്നു. മറ്റു വിവിധ മേഖലകൾ തുറന്നുകൊടുത്ത ഘട്ടത്തിലും ഇവക്ക്​ തുറക്കാൻ അനുമതി ലഭിച്ചില്ല. ശീശ തുറക്കാൻ അനുവദിക്കണമെന്നാവശ്യപ്പെട്ട്​ ഉടമകൾ നേരത്തേ ഒരുമാസത്തിനിടെ രണ്ടുതവണ ആരോഗ്യമന്ത്രാലയ ആസ്ഥാനത്തിന്​ മുന്നിൽ പ്രതിഷേധിച്ചിരുന്നു.

വൻ കടബാധ്യത വരുത്തിയത്​ ചൂണ്ടിക്കാട്ടിയുള്ള സമരം അധികൃതർ ഗൗനിച്ചിരുന്നില്ല. വൻ വ്യാപാര നഷ്​ടമാണ്​ ഉണ്ടാക്കിയതെന്നും കഫേകളിലെ ഉപഭോക്​താക്കളെ ഏറെ ആകർഷിച്ചിരുന്നത്​ ശീശ ആയിരുന്നുവെന്നും പ്രതിഷേധക്കാർ പറഞ്ഞു. ഹുക്ക അനുമതിയില്ലാത്തതിനാൽ കഫേകൾക്ക്​ വ്യാപാര നഷ്​ടം ഉണ്ടാവുന്നുവെന്നും കനത്ത പ്രതിസന്ധിയിലാണെന്നുമാണ്​ പ്രതിഷേധക്കാർ ചൂണ്ടിക്കാട്ടിയത്​.

എന്നാൽ, വ്യക്തി താൽപര്യത്തേക്കാൾ സമൂഹത്തി​െൻറ താൽപര്യമാണ്​ പ്രധാനമെന്നും വൈറസ്​ വ്യാപനത്തിന്​ കാരണമാവുന്ന ഇളവുകൾ നൽകേണ്ടെന്നും ആരോഗ്യ മന്ത്രാലയം തീരുമാനിച്ചു.ഇപ്പോൾ തുറക്കാൻ അനുമതി നൽകിയതിനെ യൂനിയൻ സ്വാഗതം ചെയ്​തു.5000ത്തോളം കഫേകൾ രാജ്യത്ത്​ ഉണ്ടെന്നാണ്​ കണക്ക്​. ഇനി തുറക്കാൻ കഴിയാത്ത വിധം പലരും കടക്കെണിയിൽ അകപ്പെട്ടിട്ടുണ്ട്​.