നമസ്​കാരത്തിനെത്താൻ കർഫ്യൂ പ്രശ്​നമാവില്ല

കുവൈത്ത്​ സിറ്റി: ബുധനാഴ്​ച മുതൽ കുവൈത്തിൽ പള്ളികൾ തുറക്കു​േമ്പാൾ കർഫ്യൂ സമയത്തും നിർബന്ധ നമസ്​കാരങ്ങൾക്ക്​ എത്താം. 
ഒൗഖാഫ്​ മന്ത്രി ഫഹദ്​ അൽ അഫാസിയാണ്​ വാർത്തക്കുറിപ്പിൽ ഇക്കാര്യം വ്യക്​തമാക്കിയത്​. രാജ്യത്ത്​ വൈകീട്ട്​ ആറു മുതൽ രാവിലെ ആറ്​  വരെയാണ്​ കർഫ്യൂ​. ഇൗ സമയത്ത്​ വരുന്ന മഗ്​രിബ്​, ഇശാ, സുബ്​ഹ്​ നമസ്​കാരങ്ങൾക്ക്​ തൊട്ടടുത്ത പള്ളിയിലേക്ക്​ നടന്നുപോവാം. എന്നാൽ, വാഹനത്തിൽ പോവാൻ അനുമതിയില്ല. ജനസാന്ദ്രത കുറഞ്ഞ പാർപ്പിട മേഖലകളിൽ ആണ് ആദ്യഘട്ടത്തിൽ പള്ളികൾ തുറക്കുക. രാജ്യത്തി​​െൻറ വിവിധ ഭാഗങ്ങളിലായി 900ത്തോളം പള്ളികൾ അണുവിമുക്തമാക്കി​. 

പാർപ്പിട മേഖലകളിലെ പള്ളികൾ ബുധനാഴ്ച മധ്യാഹ്ന പ്രാർഥനയോടെയാണ്  തുറക്കുക. അഞ്ചു നേരത്തെ നിർബന്ധ നമസ്​കാരങ്ങൾക്ക്​ മാത്രമാണ്​ ആദ്യഘട്ടത്തിൽ അനുമതി നൽകിയത്​. ശാരീരിക അകലം പാലിക്കൽ ഉൾപ്പെടെ ആരോഗ്യമാനദണ്ഡങ്ങൾ പാലിച്ചായിരിക്കും പള്ളിയിൽ പ്രവേശനമെന്നും അധികൃതർ വ്യക്തമാക്കി. കോവിഡ് നിയന്ത്രണങ്ങളുടെ ഭാഗമായി മാർച്ച് 13 മുതലാണ് രാജ്യത്തെ പള്ളികൾ അടച്ചിട്ടത്.

കർഫ്യൂ ലംഘനം: അഞ്ചുപേർ അറസ്​റ്റിൽ
കുവൈത്ത്​ സിറ്റി: കർഫ്യൂ ലംഘനവുമായി ബന്ധപ്പെട്ട്​ ഞായറാഴ്​ച കുവൈത്തിൽ അഞ്ചുപേർ അറസ്​റ്റിലായി. നാല്​ കുവൈത്തികളും ഒരു വിദേശിയുമാണ്​ പിടിയിലായത്​. ഹവല്ലി ഗവർണറേറ്റിൽ മൂന്നുപേർ, അഹ്​മദി ഗവർണറേറ്റിൽ രണ്ടുപേർ എന്നിങ്ങനെയാണ്​ പിടിയിലായത്​. കാപിറ്റൽ, ഫർവാനിയ, ജഹ്​റ, മുബാറക്​ അൽ കബീർ ഗവർണറേറ്റുകളിൽ ആരും അറസ്​റ്റിലായില്ല.