ഖത്തറും കുവൈത്തും ധാരണപത്രങ്ങളിൽ ഒപ്പിട്ടു

കുവൈത്ത്​ സിറ്റി: കുവൈത്തും ഖത്തറും വിവിധ ധാരണപത്രങ്ങളിൽ ഒപ്പിട്ടു. ഒാൺലൈനായി നടത്തിയ കുവൈത്തി, ഖത്തരി ഹയർ കോഒാപറേഷൻ കമ്മിറ്റിയുടെ അഞ്ചാമത്​ യോഗത്തിലാണ്​ വിവിധ മേഖലകളിൽ സഹകരിച്ച്​ പ്രവർത്തിക്കാൻ ധാരണയായത്​. കുവൈത്ത്​ വിദേശകാര്യ മന്ത്രി ഡോ. അഹ്​മദ്​ നാസർ അസ്സബാഹും ഖത്തർ വിദേശകാര്യ മന്ത്രി ശൈഖ്​ മുഹമ്മദ്​ ബിൻ അബ്​ദുറഹ്​മാൻ ആൽ താനിയുമാണ്​ ധാരണപത്രങ്ങളിൽ ഒപ്പിട്ടത്​.

കോവിഡ്​ പ്രതിസന്ധിയിൽ അകപ്പെട്ട കുവൈത്ത്​ പൗരന്മാർക്ക്​ ആതിഥേയത്വം നൽകിയതിനും അവരെ കുവൈത്തിലെത്തിക്കാൻ നടപടികൾ സ്വീകരിച്ചതിനും ഖത്തർ അധികൃതർക്ക്​ ഡോ. അഹ്​മദ്​ നാസർ അസ്സബാഹ്​ നന്ദി അറിയിച്ചു.

നേരിട്ടുള്ള വിദേശ നിക്ഷേപം, സേവനങ്ങളും ഭരണവികസനവും, ഇസ്​ലാമിക കാര്യം, കാർഷിക മേഖല തുടങ്ങിയവയിലാണ്​ സഹകരിച്ച്​ പ്രവർത്തിക്കാൻ ധാരണയായത്​.