കുവൈത്തിൽ 30,000ത്തിന്​ മുകളിൽ രജിസ്​ട്രേഷൻ

കുവൈത്ത്​ സിറ്റി: നാട്ടിൽ പോകാൻ ആഗ്രഹിക്കുന്ന പ്രവാസികളെ തിരിച്ചെത്തിക്കുന്ന മെഗാ ദൗത്യത്തിന്​ ചൊവ്വാഴ്​ച വൈകുന്നേരം വരെ കുവൈത്തിൽ രജിസ്​റ്റർ ചെയ്​തത്​ 30,000ത്തിലധികം പേർ​. ഒരാഴ്​ച നീളുന്ന ആദ്യഘട്ടത്തിൽ കുവൈത്തിൽനിന്ന്​ അഞ്ചു വിമാനങ്ങളിലായി 1000 പേർ മാത്രമാണ്​ തിരിച്ചുപോവുന്നത്​. മുഴുവൻ പേരെയും കൊണ്ടുപോകാൻ ആഴ്​ചകളെടുക്കും. എത്രയും വേഗം നാട്ടിലെത്തണമെന്ന മാനസികാവസ്ഥയിലാണ്​ നിരവധി പ്രവാസികൾ​. ഇവിടെ രോഗികൾ വർധിച്ചുവരുന്നതും നാട്ടിൽ സ്ഥിതി നിയന്ത്രണവിധേയമാവുന്നതുമാണ്​ ഒരുകാരണം. 

ജോലിയും വരുമാനവും ഇല്ലാതെ ഇവിടെ പിടിച്ചുനിൽക്കാനും ബുദ്ധിമുട്ടാണ്​. സന്ദർശക വിസയി​ലെത്തി കുടുങ്ങിയ നിരവധി പേരുണ്ട്​.  40ലധികം കമ്പനികൾ തൊഴിലാളികളെ തിരികെ നാട്ടിൽ കൊണ്ടുപോകണമെന്നാവശ്യപ്പെട്ട്​ ഇന്ത്യൻ എംബസിയെ സമീപിച്ചിട്ടുണ്ട്​. പൊതുമാപ്പിൽ രജിസ്​റ്റർ ചെയ്​ത 12,000ത്തോളം ഇന്ത്യക്കാർ ഉൗഴംകാത്ത്​ ക്യാമ്പിൽ കഴിയുകയാണ്​. 

ഇവർക്ക്​ യാത്രാസൗകര്യമൊരുക്കുന്ന ഉത്തരവാദിത്തം കുവൈത്ത്​ ഏറ്റെടുത്തിട്ടുണ്ട്​. ഇന്ത്യൻ അധികൃതരിൽനിന്ന്​ അനുമതി ലഭിച്ചാലുടൻ കുവൈത്ത്​ ഇതിനുള്ള നടപടിക്രമങ്ങൾ ആരംഭിക്കും. മടക്കയാത്ര വേഗത്തിലാക്കണമെന്നാവശ്യപ്പെട്ട്​ ക്യാമ്പിലുള്ളവർ പ്രതിഷേധം ഉയർത്തുന്നുണ്ട്​. 
ഇന്ത്യക്കാർ പരസ്യമായ പ്രതിഷേധം ഉയർത്തുന്നില്ല. ഇൗജിപ്​തുകാർ കഴിഞ്ഞദിവസം പരസ്യപ്രതിഷേധം ഉയർത്തിയതിനെ തുടർന്ന്​ പൊലീസും സൈന്യവും എത്തിയാണ്​ സ്ഥിതി ശാന്തമാക്കിയത്​.