കുവൈത്തിൽ വാഹനാപകടത്തിൽ ഏഴുപേർ മരിച്ചു; രണ്ട് മലയാളികൾ അടക്കം നാലുപേർക്ക് പരിക്ക്

കുവൈത്ത് സിറ്റി: കുവൈത്തിൽ സെവൻത് റിങ് റോഡിലുണ്ടായ വാഹനാപകടത്തിൽ ഏഴ് പ്രവാസികൾ മരിച്ചു. രണ്ടു മലയാളികൾ അടക്കം നാല് പേർക്ക് പരിക്കേറ്റു. പരിക്കേറ്റവരിൽ ഒരാളുടെ നില ഗുരുതരമാണ്.

അഞ്ച് ഇന്ത്യക്കാരും രണ്ട് ബംഗ്ലാദേശ് സ്വദേശികളുമാണ് മരിച്ചത്. മരണപ്പെട്ട ഇന്ത്യക്കാരില്‍ നാല് പേര്‍ പഞ്ചാബ് സ്വദേശികളും ഒരാൾ തമിഴ്‌നാട്ടുകാരനുമാണ്.

പ്രാദേശിക കമ്പനിയിലെ ജീവനക്കാരാണ് അപകടത്തിൽപെട്ടത്. ഇവർ സഞ്ചരിച്ച വാൻ അബ്ദുല്ല അൽ മുബാറക് ഏരിയയ്ക്ക് സമീപം അപകടത്തിൽപെടുകയായിരുന്നു. തൊഴിലാളികൾ ജോലി കഴിഞ്ഞ് തിരിച്ചുവരുന്നതിനിടെ ​ചൊവ്വാഴ്ച രാവിലെയാണ് അപകടം.