കുവൈത്തിൽ ടാക്​സി സർവിസുകൾ ഇന്നുമുതൽ 

കുവൈത്ത്​ സിറ്റി: കുവൈത്തിൽ നാലുമാസത്തിന്​ ശേഷം ടാക്​സി സർവിസുകൾ ചൊവ്വാഴ്​ച പുനരാരംഭിക്കുന്നു. കോവിഡ്​ പ്രതിരോധത്തിന്​ ഏർപ്പെടുത്തിയ നിയന്ത്രണങ്ങൾ നീക്കുന്നതി​​െൻറ മൂന്നാം ഘട്ടം ആരംഭിക്കുന്നതിനൊപ്പമാണ്​ ചൊവ്വാഴ്​ച മുതൽ നിയന്ത്രണങ്ങളോടെ ടാക്​സി ഒാട്ടത്തിന്​ അനുമതി ലഭിക്കുന്നത്​. ഒരു യാത്രക്കാരനെ മാത്രമേ കയറ്റാവൂ എന്ന നിബന്ധനയോടെയാണ്​ അനുമതി. അതേസമയം, ‘ഒരു യാത്രക്കാരൻ’ നിബന്ധന ഒഴിവാക്കണമെന്ന്​ ഡ്രൈവർമാർ ആവശ്യം ഉന്നയിക്കുന്നുണ്ട്​. തൊഴിൽ പുനരാരംഭിച്ചാലും യാത്രക്കാരെ ലഭിക്കുമോ എന്നതാണ് മറ്റൊരു ആശങ്ക. ഈ മേഖല സജീവമാകാൻ കുറഞ്ഞത് ആറുമാസമെങ്കിലും വേണമെന്നാണ് ജീവനക്കാർ കണക്കുകൂട്ടുന്നത്.

 ഇപ്പോൾ നിർത്തിവെച്ച ദിവസവാടക കൂടി തവണകളായി നൽകാൻ കമ്പനി ഉടമകൾ ആവശ്യപ്പെടുമോയെന്ന ആശങ്കയും ഇവർക്കുണ്ട്​. കുവൈത്തിലെ 18000ത്തോളം ടാക്​സി തൊഴിലാളികളാണുള്ളത്​. തൊഴിൽ പൂർണമായും നിലച്ചതോടെ ഈ മേഖലയിലെ ജീവനക്കാർ കടുത്ത പ്രതിസന്ധിയിലായിരുന്നു.​ മാർച്ച്​ 27 മുതലാണ്​ കുവൈത്തിൽ ടാക്​സി സർവിസ്​ നിർത്തലാക്കിയത്​. കൃത്യം നാലുമാസം പിന്നിടുന്നതി​​െൻറ പിറ്റേന്നാണ്​ ഇവർക്ക്​ മുന്നിൽ വരുമാന വാതിൽ തുറക്കാൻ പോവുന്നത്​. ടാക്സി ഡ്രൈവർമാരിൽ 95 ശതമാനവും കമ്പനികളുടെ ടാക്സി കാർ നാല്​ മുതൽ അഞ്ച്​ വർഷത്തെ കരാർ ഒപ്പിട്ടുനൽകി ദിവസം ഏഴുമുതൽ എട്ട്​ ദീനാർ വരെ വരുന്ന വാടക കമ്പനിക്ക്​ നൽകി കാർ അറ്റകുറ്റപ്പണി സ്വന്തമായി ചെയ്യണമെന്ന വ്യവസ്ഥയിൽ തൊഴിലെടുക്കുന്നവരാണ്. 
ഒാട്ടം നിലച്ച സമയത്ത്​ കമ്പനികൾക്ക്​ വാടക നൽകിയിരുന്നില്ല. ഒാട്ടം പുനരാരംഭിച്ചത്​ മുതൽ കമ്പനിക്ക്​ വാടക നൽകേണ്ടിവരുകയും എന്നാൽ, അതനുസരിച്ചുള്ള വരുമാനം ലഭിക്കാതെ വരുകയും ചെയ്യുമോയെന്ന ആശങ്കയാണ്​ ഡ്രൈവർമാർ പങ്കുവെക്കുന്നത്​.