വീണ്ടും ‘സാ​േങ്കതിക തകരാർ’; പണമടച്ചിട്ടും ടിക്കറ്റ്​ നിഷേധിച്ച്​ എയർ ഇന്ത്യ

മസ്​കത്ത്​: പണമടച്ചവർക്ക്​ ടിക്കറ്റ്​ നിഷേധിച്ച്​ വീണ്ടും എയർഇന്ത്യ. ഇന്നത്തെ കോഴിക്കോട്​ വിമാനത്തിൽ കുട്ടികളുമായി യാത്ര ചെയ്യാനിരുന്ന മലപ്പുറം സ്വദേശികളായ രണ്ട്​ ഗർഭിണികളും കുട്ടികളുമാണ്​ ഇക്കുറി എയർഇന്ത്യയുടെ വിനോദത്തിന്​ ഇരയായത്​. ഗ്രാൻറ്​ ഹൈപ്പർമാർക്കറ്റിൽ ജോലി ചെയ്യുന്ന മലപ്പുറം പുത്തനത്താണി സ്വദേശി നൗഫലി​​​െൻറ ഭാര്യ, രണ്ട്​ വയസുള്ള കുട്ടി, മവേല പച്ചക്കറി മാർക്കറ്റിൽ ജോലി ചെയ്യുന്ന മലപ്പുറം കോട്ടക്കൽ സ്വദേശി മുനീറി​​​െൻറ ഭാര്യ, മൂന്ന്​ വയസുള്ള കുട്ടി എന്നിവരാണ്​ പണമടച്ചിട്ടും ടിക്കറ്റ്​ ലഭിക്കാത്തവർ​.
പണമടച്ചപ്പോൾ 31ന്​ ടിക്കറ്റ്​ ഇമെയിലിൽ ലഭിക്കുമെന്നാണ്​ അറിയിച്ചിരുന്നത്​​. ഇതനുസരിച്ച്​ യാത്രക്കുള്ള ഒരുക്കങ്ങളെല്ലാം നടത്തി ടിക്കറ്റിനായി കാത്തിരുന്ന ഇവർക്ക്​ ഫ്ലൈറ്റ്​ ഫുൾ ആയതായും അടുത്ത വിമാനത്തിൽ പരിഗണിക്കാമെന്നുമുള്ള മറുപടിയാണ്​ ഞായറാഴ്​ച വൈകുന്നേരം ലഭിച്ചത്​. ടിക്കറ്റില്ലെന്ന കാര്യം ഇമെയിലായി അറിയിക്കാൻ പറഞ്ഞപ്പോൾ അടുത്ത കോഴിക്കോട്​ വിമാനത്തിൽ മുൻഗണനാ പട്ടികയിൽ പരിഗണിക്കാമെന്നാണ്​ മാത്രം പറഞ്ഞ്​ വിളിച്ചയാൾ ഫോൺ കട്ട്​ ചെയ്യുകയായിരുന്നെന്നും ഇവർ പറഞ്ഞു.  നിലവിലുള്ള ഷെഡ്യുളിൽ കോഴിക്കോടിനുള്ള വിമാനം ഇനി ഇല്ല.  പ​ുതിയ ഷെഡ്യൂൾ പ്രഖ്യാപിച്ചാൽ മാത്രമേ ഇവർക്ക്​ എന്ന്​ യാത്ര ചെയ്യാൻ കഴിയുമെന്ന്​ അറിയാൻ സാധിക്കുകയുള്ളൂ.
കഴിഞ്ഞ 21നുള്ള വിമാനത്തിൽ പോകുന്നുണ്ടോയെന്ന്​ ചോദിച്ച്​ എംബസിയിൽ ചോദിച്ചിരുന്നതായി നൗഫൽ പറഞ്ഞു. എയർ ഇന്ത്യയിൽ നിന്നുള്ള വിളിയും കാത്തിരുന്നെങ്കിലും ആരും വിളിച്ചില്ല. തുടർന്ന്​ കഴിഞ്ഞ 25നാണ്​ ഒന്നാം തീയതിക്കുള്ള വിമാനത്തിലേക്ക്​ വിളി വരുന്നത്​. കൺഫർമേഷ​​​െൻറ അടിസ്​ഥാനത്തിൽ എയർ ഇന്ത്യയിൽ നിന്ന്​ വിളിച്ച്​ മുപ്പതാം തീയതിക്കുള്ളിൽ പണമടക്കാൻ  അറിയിച്ചു. തുടർന്ന്​ രേഖകൾ എല്ലാം അയച്ചുകൊടുത്തെങ്കിലും ടിക്കറ്റില്ലെന്ന മറുപടിയാണ്​ ഇന്നലെ ലഭിച്ചത്​.
വിസിറ്റിങ്​ വിസയിലുള്ള ഭാര്യയുമായി അമിറാത്തിലാണ്​ നൗഫൽ താമസിക്കുന്നത്​. വീട്ടുടമ മുറി ഒഴിയാൻ ആവശ്യപ്പെട്ടിരുന്നു. ടിക്കറ്റ്​ ലഭിച്ചതി​​​െൻറ അടിസ്​ഥാനത്തിൽ ഒന്നാം തീയതി മാറുകയാണെന്നും അറിയിച്ചിരുന്നു. ഒപ്പം ഫ്രിഡ്​ജ്​ അടക്കം വീട്ടുസാധനങ്ങൾ വിൽപന നടത്തുകയും ചെയ്​തു. യാത്ര മുടങ്ങുന്ന സാഹചര്യത്തിൽ കുറച്ച്​ ദിവസം കൂടി നിൽക്കാമെങ്കിലും ജൂണിൽ തന്നെ ഒഴിഞ്ഞുകൊടുക്കേണ്ടി വരും. അടുത്ത ഘട്ട സർവീസ്​ പ്രഖ്യാപിച്ച്​ ടിക്കറ്റ്​ കിട്ടിയാൽ മാത്രമേ സമാധാനമാവുകയുള്ളൂവെന്ന്​ നൗഫൽ പറയുന്നു.
മുനീറിനോട്​ കഴിഞ്ഞ 21നുള്ള വിമാനത്തിൽ പോകാൻ എയർ ഇന്ത്യയിൽ നിന്ന്​ വിളിക്കുമെന്ന്​ അറിയിച്ചിരുന്നു. എന്നാൽ എയർ ഇന്ത്യ വിളിക്കുന്നത്​ ഒന്നാം തീയതിയിലെ വിമാനത്തിൽ പോകാനാണ്​. ഇതനുസരിച്ച്​ പണമടച്ചെങ്കിലും ടിക്കറ്റില്ലെന്ന മറുപടിയാണ്​ ലഭിച്ചത്​. ഇക്കഴിഞ്ഞ മുപ്പതാം തീയതിയിലെ തിരുവനന്തപുരം വിമാനത്തിൽ യാത്ര ചെയ്യാനിരുന്ന കൊല്ലം സ്വദേശിനിയായ 64കാരിക്കും പണമടച്ചിട്ടും ടിക്കറ്റ്​ നിഷേധിച്ചിരുന്നു. ഇതേ കുറിച്ച്​ അന്വേഷിച്ചപ്പോൾ സാ​േങ്കതിക തകരാർ ആയിരിക്കും കാരണമെന്നാണ്​ മറുപടി ലഭിച്ചത്​. ഒരേ തരത്തിൽ തുടരുന്ന ‘സാ​േങ്കതിക തകരാർ’ പരിഹരിക്കാൻ എംബസി അധികൃതർ ഇടപെടലുകൾ നടത്തുമെന്ന പ്രതീക്ഷയിലാണ്​ ഒമാനിലെ പ്രവാസി സമൂഹം.  
രണ്ടാം ഘട്ട സർവീസുകൾ മുതൽ ടിക്കറ്റ്​ വിതരണമടക്കം വിഷയങ്ങളിൽ ആക്ഷേപമുയരുന്നുണ്ട്​. എംബസിയിൽ നിന്ന്​ ഷോർട്ട്​ലിസ്​റ്റ്​ ചെയ്​ത അറിയിപ്പ്​ ലഭിച്ച പലർക്കും എയർഇന്ത്യ ഒാഫീസിൽ നിന്നുള്ള വിളി ഇപ്പോഴും ലഭിച്ചിട്ടില്ല. എന്നാൽ എയർ ഇന്ത്യ ഒാഫീസിൽ നേരി​െട്ടത്തി കാര്യം അന്വേഷിച്ച പലരും ടിക്കറ്റ്​ ലഭിച്ച്​ നാടുപറ്റിയ അനുഭവങ്ങളുമുണ്ട്​. യാത്രക്കാരെ തിരുകി കയറ്റുന്നത്​ വ്യാപകമാണെന്ന്​ ചില സാമൂഹിക പ്രവർത്തകർ നേരത്തേ തന്നെ ആക്ഷേപം ഉന്നയിച്ചിട്ടുണ്ട്​. ഇതുവഴി അനർഹരായ പലരും നാട്ടിലെത്തിയിട്ടുണ്ട്​. ഗുരുതര ആരോഗ്യ പ്രശ്​നങ്ങളുള്ളവരടക്കം നിരവധി പേരാണ്​ ഇപ്പോഴും എന്നാണ്​ നാട്ടിലെത്താൻ കഴിയുകയെന്നറിയാതെ ആശങ്കയിൽ കഴിയുന്നത്​.