മസ്കത്ത്​-കോഴിക്കോട് റൂട്ടിൽ വീണ്ടും സർവിസ്​ റദ്ദാക്കി എയർ ഇന്ത്യ എക്​സ്​പ്രസ്​

മസ്കത്ത്​: മസ്കത്ത്​-കോഴിക്കോട്​ റൂട്ടിൽ വീണ്ടും സർവിസുകൾ റദ്ദാക്കി എയർ ഇന്ത്യ എക്​സ്​പ്രസ്​. വെള്ളിയാഴ്ച പുലർച്ചെ നാല്​ മണിക്ക്​ കോ​ഴിക്കോട്ടുനിന്ന്​ പുറപ്പെട്ട്​ മസ്കത്തിൽ​ ആറിന്​​ എത്തുന്ന​ ഐ.എക്സ് ​0333 വിമാനവും മസ്കത്തിൽനിന്ന്​ രാവിലെ ഏഴ്​ മണിക്ക്​ പുറപ്പെട്ട്​ ഉച്ചക്ക്​ 12.10ന്​ കോഴിക്കോട്​ എത്തുന്ന ഐ.എക്സ് ​0334 വിമാനവുമാണ്​ റദ്ദാക്കിയതെന്ന്​ എയർ ഇന്ത്യ അധികൃതർ അറിയിച്ചു.

മസ്കത്തിൽ നിന്ന്​ കേരള സെക്​ടറിലേക്കുള്ള സർവിസുകൾ തുടർച്ചയായി റദാക്കുന്നത്​ യാത്രക്കാരുടെ ദുരിതം ഇരട്ടിക്കുന്നുണ്ട്​.​ ബുധനാഴ്​ച കോഴിക്കോട്​, കണ്ണൂർ റൂട്ടിലും ചൊവ്വാഴ്ച തിരുവനന്തപുരം, കണ്ണൂർ എന്നിവിടങ്ങളിലേക്കുമുള്ള സർവിസുകളും മുടങ്ങിയിരുന്നു.

ഇതിനുപിന്നാ​ലെയാണ്​ വെള്ളിയാഴ്ചയും വിമാനം റദ്ദാക്കിയുള്ള അറിയിപ്പ്​ യാത്രകാർക്ക്​ ലഭിച്ചിരിക്കുന്നത്​. അത്യാവശ്യ കാര്യങ്ങൾക്ക്​ നാട്ടിൽപോകേണ്ടവരാണ്​ എയർ ഇന്ത്യയുടെ പിടിപ്പുകേടുമൂലം പ്രയാസത്തിലായിരിക്കുന്നത്​. കഴിഞ്ഞ ദിവസങ്ങളിൽ യാത്ര മുടങ്ങിയ പലരും മറ്റ്​ വിമാന കമ്പനികൾക്ക്​ ഉയർന്ന നിരക്ക്​ നൽകി യാത്ര നടത്താൻ ശ്രമിച്ചെങ്കിലും ടിക്കറ്റ്​ ലഭ്യമല്ലാത്തത്​ ​പ്രയാസത്തിലാക്കി​. പ്രവാസികളുടെ യാത്ര പ്രശ്​നം ബന്ധപ്പെട്ടവരുടെ ശ്രദ്ധയിൽപ്പെടുത്തിയിട്ടും പരിഹാരമില്ലാ​തെ തുടരുകയാണ്​.