എയർബബ്​ൾ കരാർ പുനരവലോകനം: കാരണം യാത്രക്കാരുടെ കോവിഡ്​ ബാധ

മസ്​കത്ത്​: ഒമാനും ഇന്ത്യയും തമ്മിലെ എയർ ബബ്​ൾ കരാർ പ്രകാരമുള്ള സീറ്റുകളുടെ എണ്ണം പുനരവലോകനം ചെയ്യാൻ കാരണമായത്​ ഒമാനിലേക്ക്​ വന്ന യാത്രക്കാരിൽ പലർക്കും കോവിഡ്​ ബാധ കണ്ടെത്തിയത്​. ഒരു വശത്തേക്കുള്ള പ്രതിവാര സീറ്റുകൾ 5000മായാണ്​ കുറച്ചതെന്ന്​ ഒമാൻ സിവിൽ ഏവിയേഷൻ അതോറിറ്റി വക്താവിനെ ഉദ്ധരിച്ച്​ പ്രാദേശിക ദിനപത്രം റിപ്പോർട്ട്​ ചെയ്​തു. ​സീറ്റുകൾ കുറച്ചതിനെ തുടർന്നാണ്​ സ്വകാര്യ കമ്പനികൾക്ക്​ അനുമതി നിഷേധിക്കപ്പെട്ടത്​. നേരത്തേ ഒരു വശത്തേക്ക്​ 10,000 യാത്രക്കാർ എന്നതായിരുന്നു കരാറിലെ ധാരണ. ഇതാണ്​ 5000 ആയി കുറച്ചത്​. സാഹചര്യം ചൂണ്ടിക്കാട്ടി യാത്രക്കാരുടെ എണ്ണം കുറക്കുന്നത്​ സംബന്ധിച്ച അഭ്യർഥന തങ്ങൾ ഇന്ത്യൻ അധികൃതർക്ക്​ മുന്നിൽ വെക്കുകയായിരുന്നു.

ഇന്ത്യൻ വ്യോമയാന മന്ത്രാലയമാണ്​ സ്വകാര്യ വിമാന കമ്പനികളോട്​ സർവിസ്​ നിർത്തിവെക്കാൻ നിർദേശിച്ചതും അനുവദനീയമായ സീറ്റുകൾ എയർഇന്ത്യക്കും എയർ ഇന്ത്യ എക്​സ്​പ്രസിനും മാത്രമായി നീക്കിവെച്ചതും. ഒമാനും ഇന്ത്യക്കുമിടയിൽ ഏത്​ വിമാന കമ്പനികൾ സർവിസ്​ നടത്തുന്നതിനും തങ്ങൾക്ക്​ കുഴപ്പമില്ല. ഇതി​െൻറ അന്തിമ തീരുമാനമെടുക്കേണ്ടത്​ ഇന്ത്യൻ അധികൃതരാണ്​. ഇന്ത്യയിലെ ഏത്​ നഗരത്തിൽ നിന്നും ഒമാനിലേക്ക്​ സർവിസ്​ നടത്താം. എന്നാൽ, ഒമാൻ വിമാന കമ്പനികൾക്ക്​ 11 ഇടങ്ങളിലേക്ക്​ സർവിസ്​ നടത്താൻ മാത്രമാണ്​ അനുമതിയുള്ളത്​.

കഴിഞ്ഞ തിങ്കളാഴ്​ച മുതലാണ്​ സ്വകാര്യ വിമാന കമ്പനികളായ ഇൻഡിഗോയും സ്​പൈസ്​ ജെറ്റും ഗോ എയറുമടക്കം ഒമാനിലേക്കും തിരിച്ചുമുള്ള സർവിസുകൾ നിർത്തലാക്കിയത്​. ഇത്​ ഒമാനിൽനിന്ന്​ നാട്ടിൽ പോകാനിരുന്നവരെയും ഒമാനിലേക്ക്​ വരാനിരുന്നവരെയും ബുദ്ധിമുട്ടിലാക്കിയിരുന്നു​. വിമാനങ്ങളുടെ എണ്ണം കുറഞ്ഞതിന്​ ഒപ്പം ടിക്കറ്റ്​ നിരക്കുകളും ഉയർന്നതിനാൽ പലരും യാത്ര റദ്ദാക്കിയിട്ടുണ്ട്​.