‘ബിപോർജോയ്​’ ചുഴലിക്കാറ്റ്​ തിങ്കളാഴ്ച മുതൽ ഒമാനെ ബാധിച്ചേക്കും

മസ്കത്ത്​: അറബിക്കടലിൽ രൂപംകൊണ്ട ബിപോർജോയ്​ ചുഴലിക്കാറ്റ്​ അടുത്ത തിങ്കളാഴ്ച മുതൽ​ മസ്കത്തുൾപ്പെടെയുള്ള വിവിധ ഗവർണറേറ്റുകളിൽ ബാധിച്ചേക്കാമെന്ന്​ ഒമാൻ കാലാവസ്ഥാ നിരീക്ഷണ കേന്ദ്രത്തിലെ ഉദ്യോഗസ്ഥൻ അറിയിച്ചു. ബുധനാഴ്ച രാവിലെവരെ ചുഴലിക്കാറ്റിന്റെ ദിശയിൽ ചാഞ്ചാട്ടമാണ്​ കാണിക്കുന്നതെന്ന്​ കാലാവസ്ഥാ നിരീക്ഷണ ഡയറക്ടറേറ്റ് ജനറൽ ഡയറക്ടർ ജനറൽ അബ്ദുല്ല അൽ ഖദൂരി പറഞ്ഞു.

ഒമാൻ തീരത്തിന് സമീപം വടക്ക്, വടക്ക് പടിഞ്ഞാറ് ദിശകളിലേക്ക് മാറാനുള്ള സാധ്യത പരിഗണിക്കുകയും ജാഗ്രത പാലിക്കുകയും ചെയ്യണം. വടക്ക് പടിഞ്ഞാറ് ദിശയിലേക്കാണ്​ കാറ്റിന്‍റെ പാതയാണെങ്കിൽ ഞായറാഴ്ച വൈകുന്നേരമോ തിങ്കളാഴ്ച രാവിലെ മുതലോ സുൽത്താനേറ്റിന്റെ തീരങ്ങളിൽ നേരിട്ടുള്ള ആഘാതം നേരിടുമെന്ന്​ അൽ ഖദൂരി ഒമാനി റേഡിയോക്ക്​ കൊടുത്ത അഭിമുഖത്തിൽ പറഞ്ഞു.

ഒമാൻ കാലാവസ്ഥാ നിരീക്ഷണം സ്ഥിതിഗതികൾ സൂക്ഷ്മമായി നിരീക്ഷിക്കുന്നുണ്ടെന്നും ചുഴലിക്കാറ്റ് വടക്ക് പടിഞ്ഞാറ് തീരത്തേക്ക് നീങ്ങുന്ന സാഹചര്യത്തിൽ വ്യാഴാഴ്ച വൈകുന്നേരമോ വെള്ളിയാഴ്ച രാവിലെയോ മുന്നറിയിപ്പ്​ സർക്കുലർ ഇറക്കുമെന്ന്​ അൽ ഖദൂരി പറഞ്ഞു. തെക്കൻ ശർഖിയ, അൽ വുസ്ത, ദോഫാർ ഗവർണറേറ്റുകളെ ബാധിക്കാനാണ്​ സാധ്യത. ചുഴലിക്കാറ്റ്​ രാജ്യത്തേക്ക് പ്രവേശിക്കാതെ സുൽത്താനേറ്റിന്റെ തീരങ്ങളിലേക്ക് നീങ്ങാനാണ് ഏറ്റവും സാധ്യത. ചുഴലിക്കാറ്റ് അറബിക്കടലിന്റെ മധ്യഭാഗത്തേക്ക് വടക്കോട്ട് നീങ്ങുന്നത് തുടരുകയാണ്. ഇതിന്റെ കേന്ദ്രം സുൽത്താനേറ്റിന്റെതീരത്ത് നിന്ന് 1,133 കിലോമീറ്റർ അകലെയാണെന്നും അധികൃതർ വ്യക്​തമാക്കി.