ഇ-പേമെന്റ്: അധികൃതർ പരിശോധന തുടങ്ങി
text_fieldsവാണിജ്യ സ്ഥാപനങ്ങളിൽ അധികൃതർ പരിശോധന നടത്തുന്നു
മസ്കത്ത്: ഒമാനിലെ ഇ-പേമെന്റ് സംവിധാനം ഏർപ്പെടുത്താൻ നിശ്ചയിച്ച വാണിജ്യ സ്ഥാപനങ്ങളിൽ വാണിജ്യ, വ്യവസായ, നിക്ഷേപ പ്രോത്സാഹന മന്ത്രാലയം പരിശോധന ആരംഭിച്ചു. വ്യാപാര സ്ഥാപനങ്ങളിൽ ഇ-പേമെന്റ് സംവിധാനം ഏർപ്പെടുത്തണമെന്ന് അധികൃതർ നേരത്തെ ആവശ്യപ്പെട്ടിരുന്നു.
നിയമം നിലവിൽ വന്നതായും കഴിയും വേഗം അതത് സ്ഥാപനങ്ങൾ നടപ്പാക്കണമെന്നും രണ്ടാഴ്ച മുമ്പ് മന്ത്രാലയം ഉത്തരവിറക്കിയിരുന്നു. ഇതനുസരിച്ച് പല സ്ഥാപനങ്ങളും ഇ-സംവിധാനം ഏർപ്പെടുത്തിയിരുന്നു. ഇതുവരെയും സംവിധാനം ഏർപ്പെടുത്താത്ത സ്ഥാപനങ്ങൾ നടപടിക്രമങ്ങളും ആരംഭിച്ചു. ഫുഡ് സ്റ്റഫ് സ്ഥാപനങ്ങൾ, സ്വർണം-വെള്ളി വ്യാപാര സ്ഥാപനങ്ങൾ, റസ്റ്റാറന്റുകൾ, കഫെകൾ, പച്ചക്കറി-പഴവർഗ വ്യാപാര സ്ഥാപനങ്ങൾ, ഇലക്ട്രോണിക് സ്ഥാപനങ്ങൾ, കെട്ടിട നിർമാണ ഉൽപന്നങ്ങൾ വിൽക്കുന്ന സ്ഥാപനങ്ങൾ, പുകയില ഉൽപന്നങ്ങൾ വിൽക്കുന്ന സ്ഥാപനങ്ങൾ, വ്യവസായ മേഖല, കോംപ്ലക്സുകൾ, മാളുകൾ, ഗിഫ്റ്റ് ഇനങ്ങൾ വിൽക്കുന്ന സ്ഥാപനങ്ങൾ എന്നിവയിലാണ് ഇ-പേമെന്റ് സംവിധാനം നടപ്പാക്കിയത്.
നിലവിൽ ചെറിയ സ്ഥാപനങ്ങളധികവും ഇ-പേമെന്റ് സംവിധാനം നടപ്പാക്കിയിട്ടില്ല. ഇത് നടപ്പിൽ വരുത്തുന്നത് ഊർജിതപ്പെടുത്തുന്നതിന്റെ ഭാഗമായാണ് മന്ത്രാലയം അധികൃതരുടെ സന്ദർശനം. ഇ-പേമെന്റ് മെഷീനുകൾ സ്ഥാപിക്കാനുള്ള നടപടിക്രമങ്ങൾ എളുപ്പമാണെന്നും അപേക്ഷിച്ചാൽ രണ്ടാഴ്ചകൊണ്ട് മെഷീൻ ലഭ്യമാവുമെന്നും റൂവിയിലെ അൽ ഫൈലാക് ഹോട്ടൽ മാനേജിങ് ഡയറക്ടർ കെ.കെ. അബ്ദുൽ റഹീം പറഞ്ഞു. സ്ഥാപനത്തിന് അക്കൗണ്ടുള്ള ബാങ്കിനെയാണ് ഇ-പേമെന്റ് മെഷീന് സമീപിക്കേണ്ടത്. കമ്പനിയുടെ സി.ആർ ലെറ്ററിൽ പേരുള്ള സ്ഥാപനത്തിന്റെ ഉടമയാണ് അപേക്ഷയിൽ ഒപ്പുവെക്കേണ്ടത്.
നേരത്തെ ബാങ്കുകൾ മെഷീന് 50 റിയാൽ ഈടാക്കിയിരുന്നെങ്കിലും ഇപ്പോൾ പല ബാങ്കുകളും സൗജന്യമായാണ് മെഷീൻ നൽകുന്നതെന്നും അദ്ദേഹം പറഞ്ഞു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.