മറഡോണയുടെ വിയോഗം താങ്ങാനാകാതെ ഒമാനിലെ ആരാധകർ

മസ്​കത്ത്​: ഫുട്ബാൾ ഇതിഹാസം ഡീഗോ മറഡോണയുടെ വിയോഗം വിശ്വസിക്കാനാകാതെ സ്വദേശികളും, വിദേശികളുമായ ആരാധകർ. ബുധനാഴ്ച രാത്രി അവധി ദിനത്തി​െൻറ ആശ്വാസത്തിൽ ഇരിക്കുന്ന സമയത്താണ് ഇടിത്തീപോലെ ആ വാർത്ത വന്നത്. ഏതാനും ദിവസം മുമ്പ്​ 60ാം പിറന്നാൾ ആഘോഷിച്ച തങ്ങളുടെ പ്രിയതാരം വിടവാങ്ങിയെന്ന വാർത്ത പലർക്കും ഉൾക്കൊള്ളാനായില്ല. ഫുട്ബാൾ ദേശീയ വിനോദമായ രാജ്യത്ത്​ ലോകത്തിലെ എല്ലാ പ്രമുഖ ക്ലബുകൾക്കും കളിക്കാർക്കും ആരാധകരുണ്ട്​. ബ്രസീൽ, അർജൻറീന, സ്പെയിൻ എന്നീ അന്തർദേശീയ ടീമുകൾക്കുപുറമെ ബാഴ്സലോണ, റിയൽ മഡ്രിഡ്, ചെൽസി, തുടങ്ങിയ ക്ലബുകൾക്കും ആരാധകർ നിരവധിയാണ്​. ഇതിൽ മറഡോണക്കും പെലെക്കും മെസ്സിക്കും റൊണാൾഡോക്കും ആരാധകർ ഏറെയാണ്. പ്രിയതാരമായ മറഡോണ 2012 മാർച്ച്​ മാസത്തിൽ ഒമാനിൽ വന്നതി​െൻറ ഓർമകൾ പലരും പങ്കുവെച്ചു. അബൂദബിയിലെ അൽ വാസിൽ ക്ലബി​െൻറ പരിശീലകനായിരിക്കെ ത​െൻറ ടീമിനൊപ്പം എ.എഫ്​.സി ചാമ്പ്യൻസ്​ ലീഗി​െൻറ പ്രീ ക്വാർട്ടർ മത്സരത്തിനായാണ്​ മറഡോണ മസ്​കത്തിൽ​ എത്തിയത്. പഴയ മസ്കത്ത്​ അന്താരാഷ്​ട്ര വിമാനത്താവളത്തിൽ മണിക്കൂറുകളോളം നൂറുകണക്കിന് സ്വദേശികളും - വിദേശികളും ആയ ആരാധകർ അദ്ദേഹത്തെ കാത്തു നിന്നു. ഏറെ വൈകിയെത്തിയ തങ്ങളുടെ പ്രിയ താരത്തെ നേരിൽ കണ്ടതോടെ ആരാധകരുടെ ആവേശം അണപൊട്ടിയൊഴുകി. എന്നാൽ, അദ്ദേഹത്തി​െൻറ അടുത്തേക്കു പോകാൻ സുരക്ഷ വിഭാഗം സമ്മതിച്ചില്ല.

എന്നാൽ, മറ്റ്​ എന്തിനെക്കാളും ആരാധകരെ സ്നേഹിക്കുന്ന മറഡോണ സുരക്ഷ ജീവനക്കാരെ ശകാരിച്ച്​ മാറ്റിനിർത്തിയ ശേഷം ആരാധകരുടെ അടുത്തേക്ക് പോവുകയും തുടർന്ന് അവരുടെ ഇഷ്​ടാനുസരണം ഫോട്ടോകൾ എടുക്കാൻ അനുവദിക്കുകയും ചെയ്​തു. ത​െൻറ പ്രസിദ്ധമായ പത്താം നമ്പർ ജേഴ്സി അണിഞ്ഞുവന്ന ആരാധകർക്ക് ജേഴ്സിക്കുപുറത്ത്​ ഓട്ടോഗ്രാഫ് കൂടി നൽകിയ ശേഷമാണ്​ അദ്ദേഹം ബസിൽ കയറിയത്. അന്ന് ത​െൻറ ഒരു ആരാധകനെ പോലും അദ്ദേഹം നിരാശനാക്കിയില്ല. പിറ്റേന്ന് നടന്ന മത്സരം കാണാൻ സുൽത്താൻ ഖാബൂസ് സ്​റ്റേഡിയത്തിലേക്ക്​ ആയിരക്കണക്കിന്​ ഫുട്​ബാൾ പ്രേമികളാണ്​ ഒഴുകിയെത്തിയത്​. മത്സരം കാണുക എന്നതിലുപരിയായി തങ്ങളുടെ പ്രിയതാരത്തെ ഒരുനോക്കു കാണാനാണ്​ ആരാധകർ സ്​റ്റേഡിയത്തിലെത്തിയത്​. അന്നത്തെ മത്സരം സമനിലയിൽ കലാശിച്ചുവെങ്കിലും തങ്ങളുടെ പ്രിയതാരത്തെ കാണാൻ സാധിച്ചല്ലോ എന്ന സംതൃപ്തി ആയിരുന്നു കളി കാണാനെത്തിയവർക്ക്​.

എന്നും ത​െൻറ ആരാധകർക്കൊപ്പം നിലയുറപ്പിച്ച കളിക്കാരനായിരുന്നു മറഡോണ. ഫുട്ബാൾ ലോകത്ത്​ അർജൻറീനയുടെ ചിരവൈരികളായ ബ്രസീൽ ആരാധകർക്കുപോലും മറഡോണയുടെ മരണവാർത്ത വിശ്വസിക്കാനാകുന്നില്ല. മറഡോണ എന്ന കളിക്കാര​െൻറ കഴിവിനൊപ്പം നിൽക്കാനാകുന്ന ഒരാൾ ലോക ഫുട്ബാളിൽ ഇല്ല എന്നതാണ് സത്യമെന്ന്​ കടുത്ത ഫുട്ബാൾ ആരാധകനും റൂവിയിലെ സ്​റ്റുഡിയോ ജീവനക്കാരനുമായ രതീഷ് പറയുന്നു. ഒരു ലോകകപ്പ് ഫുട്ബാൾ ഏ​െതങ്കിലും ഒരു കളിക്കാരനുമായി ബന്ധപ്പെട്ടിരിക്കുന്നുവെങ്കിൽ അത്​ 1986ലെ ലോകകപ്പാണെന്ന്​ സിദ്ദീഖ്​ ഹസൻ പറയുന്നു. 1986 ലെ ലോകകപ്പ് എന്ന് പറയുമ്പോൾ മറഡോണ എന്നാണ് ഫുട്​ബാൾ ആരാധകരുടെ മനസ്സിലേക്ക്​ എത്തുക.

മറഡോണ എന്ന ഇതിഹാസം ലോകമുള്ള കാലത്തോളം ഓർക്കപ്പെടുമെന്നും എല്ലാ തലമുറക്കും അദ്ദേഹം പ്രചോദനമാകുമെന്നും ജോജി ജോർജ് അഭിപ്രായപ്പെട്ടു. കളിക്കളത്തിൽനിന്ന്​ വിരമിച്ചിട്ട്​ വർഷങ്ങളായെങ്കിലും ഇന്നും മറഡോണയുടെ പത്താം നമ്പർ ജഴ്​സിക്ക്​ ആവശ്യക്കാർ ഏറെയാണെന്ന്​ മത്രയിൽ കച്ചവടക്കാരനായ അനസ് അഭിപ്രായപ്പെട്ടു. കാലം എത്ര കഴിഞ്ഞാലും ഈ ജേഴ്സിക്കുള്ള ആവശ്യക്കാർ കൂടിവരുകയേ ഉള്ളൂവെന്നും അനസ് കൂട്ടിചേർത്തു. അതേ, കാലം എത്ര കഴിഞ്ഞാലും ആ പ്രതിഭയെ ലോകം ഓർക്കും. കാൽപ്പന്തു കളിയിലെ ആ മായാജാലക്കാരനെ കാലത്തിനുപോലും മായ്ക്കാൻ കഴിയില്ല. കാരണം, അത്രക്കും സുന്ദര മുഹൂർത്തങ്ങളാണ് അദ്ദേഹം മൈതാനത്തു കാഴ്ചവെച്ചത്.