ഒമാൻ വനിത ദിനത്തിൽ ഫലസ്തീനിലെ സ്​​ത്രീകൾക്ക്​ പ്രശംസയുമായി പ്രഥമ വനിത

മസ്കത്ത്​: ബോംബുകൾക്കും നാശത്തിനും ഇടയിൽ ശക്തമായി നിലകൊള്ളുന്ന ഫലസ്തീനിലെയും ഗസ്സയിലെയും വനികതൾക്ക്​ ​​​പ്രശംസയുമായി സുൽത്താന്‍റെ ഭാര്യയും പ്രഥമ വനിതയുമായ അസ്സയ്യിദ അഹ്ദ് അബ്ദുല്ല ഹമദ് അൽ ബുസൈദി. ഒമാനി വനിതാ ദിനാചരണത്തിന്‍റെ ഭാഗമായുള്ള ആശംസയിലാണ്​ ഇക്കാര്യം പറഞ്ഞത്​. ഫലസ്തീനിലെ സഹോദരിമാർക്ക്​ സമാധാനവും സ്ഥിരതയും നൽകുന്നതിന് സർവ്വശക്തനായ അല്ലാഹുവിനോട് പ്രാർഥിക്കുകയാണെന്നും പ്രഥമ വനിത പറഞ്ഞു.

ഒമാനി വനിത ദിനത്തിൽ രാജ്യത്തെ സ്ത്രീകൾക്ക്​ ആശംസകൾ നേർന്ന അസ്സയ്യിദ അഹ്ദ് അബ്ദുല്ല ഹമദ് അൽ ബുസൈദി,

സ്​​ത്രീകളുടെ നിരന്തരമായ പരിശ്രമങ്ങൾക്കും സമൂഹവും രാജ്യവും കെട്ടിപ്പടുക്കുന്നതിലുള്ള പങ്കിനും നന്ദി പറഞ്ഞു. ഒമാനി വനിതകളുടെ വിവിധ മേഖലകളിലെ പ്രയത്‌നങ്ങൾ വിലപ്പെട്ടതും അഭിനന്ദനാർഹവുമാണെന്നും അവർ പറഞ്ഞു. ഒക്​ടോബർ 17ന്​ ആണ്​ ഒമാൻ വനിതദിനമായി ആചരിക്കുന്നത്​. ഫലസ്തീൻ യുദ്ധത്തെ തുടർന്ന്​ ഒമാനി വനിതദിനാചരണ പരിപാടികൾ അധികൃതർ മാറ്റിവെച്ചിട്ടുണ്ട്​.