ദീർഘസമയ വിമാന യാത്രക്കാർക്ക്​: നാലു ദിവസത്തിനിടയിലെ പി.സി.ആർ ടെസ്​റ്റ് ഫലം മതി

മസ്​കത്ത്​: എട്ടു​ മണിക്കൂറിൽ കുറയാത്ത സമയം യാത്രയുള്ള അന്താരാഷ്​ട്ര വിമാനങ്ങളിൽ വരുന്നവർക്ക്​ നാലു ദിവസത്തിനിടെയുള്ള ​പി.സി.ആർ ടെസ്​റ്റ്​ ഫലം മതിയാകുമെന്ന്​ വ്യോമയാന വകുപ്പ്​ അറിയിച്ചു. ഒമാനിൽ എത്തുന്ന സമയത്തിന്​ 96 മണിക്കൂറിന്​ ഇടയിലായിരിക്കണം ടെസ്​റ്റ്​ നടന്നത്​.

എട്ടു മണിക്കൂറിൽ കുറഞ്ഞ സമയമുള്ള യാത്രകൾക്ക്​ 72 മണിക്കൂറിനിടയിലെ ടെസ്​റ്റ്​ ഫലമാണ്​ വേണ്ടത്​. കോവിഡ്​ സ്​ഥിരീകരിച്ച ശേഷം ക്വാറൻറീൻ പൂർത്തീകരിച്ച ഒമാനി പൗരന്മാർക്ക്​ യാത്രക്ക്​ അനുമതി നൽകുമെന്നും പ്രസ്​താവനയിൽ വ്യക്​തമാക്കി. യാത്രയുടെ മറ്റു മാനദണ്ഡങ്ങളിൽ മാറ്റമില്ല. നേരത്തേ അറിയിച്ച എല്ലാ നിർ​ദേശങ്ങളും എല്ലാവരും പാലിക്കണം. ആരോഗ്യ വകുപ്പുമായി ആലോചിച്ചാണ്​ പുതുക്കിയ നിർദേശം തയാറാക്കിയിരിക്കുന്നത്​.