മസീറയിൽ മത്സ്യബന്ധന ബോട്ടിന്​ തീപിടിച്ച്​ നാല്​ ഇന്ത്യക്കാർക്ക്​ പരിക്ക്​

മസ്​കത്ത്​: മസീറയിൽ മത്സ്യബന്ധന ബോട്ടിന്​ തീപിടിച്ച്​ നാല്​ ഇന്ത്യക്കാർക്ക്​ പരിക്കേറ്റു. കന്യാകുമാരി സ്വദേശികളായ േജാൺ ബെർലിൻ, കേസർരാജ്​, സഹായപ്രഭു, പ്രകാശ്​ എന്നിവർക്കാണ്​ പൊള്ളലേറ്റത്​. ഇതിൽ രണ്ടുപേർക്ക്​ സാരമായ പൊള്ളലേറ്റിട്ടുണ്ട്​. ബുധനാഴ്​ചയാണ്​ സംഭവം നടന്നത്​. ബാറ്ററിക്ക് തകരാറുണ്ടായിരുന്ന ബോട്ട്​ ഹാർബറിൽ അറ്റകുറ്റപ്പണി നടത്തവേ തീ പടരുകയായിരുന്നു.

പരിക്കേറ്റവർ മസീറ ആശുപത്രിയിൽ ചികിത്സയിലാണ്​. ബോട്ട്​ പൂർണമായും കത്തിനശിച്ചു. മസ്​കത്ത്​ ഗവർണറേറ്റിൽ അപ്പാർട്ട്​മെൻറിന്​ തീപിടിച്ച്​ രണ്ട്​ പേർക്ക്​ പരിക്കേൽക്കുകയും ചെയ്​തു.സീബിൽ ബുധനാഴ്​ച രാത്രിയായിരുന്നു സംഭവം. പൊള്ളലേറ്റാണോ പുക ശ്വസിച്ചാണോ പരിക്കേറ്റത്​ എന്ന കാര്യം വ്യക്​തമല്ല. അപ്പാർട്ട്​മെൻറിലുണ്ടായിരുന്ന ആറുപേരെയാണ്​ രക്ഷിച്ചതെന്ന്​ സിവിൽ ഡിഫൻസ്​ അറിയിച്ചു.പരിക്കേറ്റവർക്ക്​ ഉടൻ അടിയന്തര ചികിത്സ നൽകി. ഇവരുടെ നില ഭദ്രമാ​െണന്നും അധികൃതർ അറിയിച്ചു.