വിവിധ ഗവർണറേറ്റുകളിൽ കനത്ത മഴ

മസ്കത്ത്​: വായു മർദ്ദത്തെ തുടർന്ന് വിവിധ ഗവർണറേറ്റുകളിൽ കനത്ത മഴ തുടരുന്നു​. കാറ്റിന്‍റെയും ഇടിയുടെയും അകമ്പടിയോടെയാണ്​ മഴ ​കോരി ചൊരിയുന്നത്​. സുഹാർ, ഖബൂറ, മസ്കത്ത്​ ഗവർണറേറ്റിലെ വിവിധ സ്ഥലങ്ങൾ എന്നിവിടങ്ങളാണ്​ സാമാന്യം ഭേദപ്പെട്ട മഴ ലഭിച്ചത്​. ആലിപ്പഴവും വർഷിച്ചു.

വിവിധ ഇടങ്ങളിലെ വാദികളിൽപ്പെട്ട്​ വാഹനങ്ങൾ ഒലിച്ചുപോയി​. ഇതിന്‍റെ വീഡിയോ സമൂഹ മാധ്യമങ്ങളിൽ പലരും പ​ങ്കുവെച്ചിട്ടുണ്ട്​.മസ്കത്ത്​ ഗവർണറേറ്റിൽ റോഡിലേക്ക്​ പാറ ഇടിഞ്ഞ്​ ഗതാഗതം തടസ്സപ്പെടുകയും വാഹനങ്ങൾക്ക്​ കേടുപാടുകൾ സംഭവിക്കുകയും ചെയ്തു.

അമീറാത്ത്-ഖുറിയത്ത് റോഡിലാണ് സംഭവം. ആർക്കും പരിക്കുകളെന്നുമില്ലെന്ന്​ സിവിൽ ഡിഫൻസ് ആൻഡ് ആംബുലൻസ് അതോറിറ്റി (സി.ഡി.എ.എ) പ്രസ്താവനയിൽ പറഞ്ഞു. രണ്ട്​ വാഹനങ്ങൾക്കാണ്​ കേടുപാടുകൾ പറ്റിയത്​​.

വിവിധ ഗവർണറേറ്റുകളിൽ ചെവ്വാഴ്ചവരെ ഒറ്റപ്പെട്ടക്കും മഴക്കും ഇടി മിന്നിലിനും സാധ്യതയുണ്ടെന്നാണ്​ ​ കാലാവസ്ഥ നിരീക്ഷണ കേ​ന്ദ്രം മുന്നറിയിപ്പ്​ നൽകിയിരിക്കുന്നത്​.